مه‌زنترین مۆزه‌خانا مۆدێرن دێ ل دهۆكێ هێته درۆستكرن
ئه‌ڤرۆ، ئه‌میر ئه‌ترووشی:
كه‌رتێ شوونواری مل ب ملێ كه‌رتێ گه‌شتوگۆزاری و چاندنێ ل پارێزگه‌ها دهۆكێ ده‌وله‌مه‌ند و بهێزه، ل سه‌نته‌رێ دهۆكێ هه‌ول دهێته دان مه‌زنترین مۆزه‌خانا مۆدێرن بهێته درۆستكرن.
د. بێكه‌س بریفكانی، رێڤه‌به‌رێ شوونوار و كه‌له‌پۆریا پارێزگه‌ها دهۆكێ دیار كر:” سه‌دان پارچێن شوونواری مه ل مۆزه‌خانا دهۆكێ هه‌نه و دهێنه پاراستن، د هه‌مان ده‌مدا، پێنج هزار پارچێن شوونواری مه ل دهۆكێ هه‌نه د ناڤا كۆگه‌هان دا مه هه‌لگرتینه، ژبه‌ر نه‌بوونا جهی نه‌هاتنه نیشاندان و گۆت ژی: “كه‌ڤنترین پارچێن شوونواری بۆ به‌ری نێزیكی 15 هزار سالان دزڤریت و ئه‌ڤه ده‌ربرینه ب وێ چه‌ندێ كۆ ل سه‌رده‌مێن كه‌ڤن دا، شارستانیه‌ت ل پارێزگه‌ها دهۆكێ هه‌بوویه”.
رێڤه‌به‌رێ شوونوار و كه‌له‌پۆریا پارێزگه‌ها دهۆكێ گۆت ژی: “ئه‌م چاڤه‌رێ هاتنا بۆدجه‌یه‌كێ نه بۆ وێ چه‌ندێ چه‌ند خۆله‌كێن دیتر درۆست بكه‌ین وه‌كه پلانه‌كا ده‌ستپێكێ بۆ وێ چه‌ندێ وان كه‌ره‌ستێن شوونواری یێن نه‌هاتینه نیشاندان، لێ دیار بكه‌ین و د هه‌مان ده‌مدا مه پلان دانایه بۆ درۆستكرنا مه‌زنترین مۆزه‌خانه ل دهۆكێ كۆ دكه‌ڤیته نێزیكی پاركا دهۆكێ ل نێزیك گرێ قه‌یسه‌ریێ، لێ درۆستكرنا وێ مۆزه‌خانێ پێدڤی بۆدجه‌كا مه‌زنه، ژبه‌ر كۆ د پلانا مه دا هه‌یه، د ناڤ وێ مۆزه‌خانا مه‌زن و مۆدێرن دا، تاقیگه‌ه و كافیتریا و خارنگه‌ه و جهێن نیشاندانا به‌رهه‌مێن كه‌لتوۆری و هۆلێن ڤه‌كری دێ ناڤ مۆزه‌خانا ناڤبری دا هێنه درۆستكرن”.
