مه‌سرور بارزانى: ب دانوستاندنێ ولێك تێگه‌هشتنێ دێ كێشێن هه‌ولێر وبه‌غدا چاره‌بن
ئه‌ڤرۆنيۆز:
شيره‌تكارێ جڤاتا ئاسايشا كوردستانێ، مه‌سرور بارزانى، ئه‌ڤرۆ ئه‌ينيێ پێشوازى ل برێت ماكگۆرك هنارتيێ تايبه‌ت يێ سه‌رۆكێ ئه‌مريكى بۆ هه‌ڤپه‌يمانيا نێڤده‌وله‌تيا شه‌رێ دژى داعشێ كر.
دوێ كۆمبوونێ دا، ماكگۆركى ل دۆر دووماهى پێشهاتێن له‌شكرى وئالۆزيێن دناڤبه‌را به‌غدا وهه‌ولێرێ دا راگه‌هاند، ئه‌مريكا هه‌ر جۆره په‌نابرنه‌كێ بۆ كريارا له‌شكرى بۆ ئێكلاكرنا كێشان ره‌ت دكه‌ت وهه‌موو بزاڤ وشيانێن خوه دێ ده‌ته كار بۆ وێ چه‌ندێ ئالۆزى نه‌مينن وهه‌ردولا ده‌ست ب دانوستاندنێ بكه‌ن هه‌تاكو ب شێوازه‌كێ ئاشتيانه و ل سه‌ر بنه‌مايێ دستوورى كێشێن خوه چاره‌بكه‌ن.
برێت ماكگۆركى هه‌لويستێ وه‌لاتێ خوه دپشته‌ڤانيا حوكمه‌تا هه‌رێما كوردستانێ وه‌كو كيانه‌كێ دستوورى دووپاتكر ودياركر كو ئه‌و خوازيارن هه‌رێما كوردستانێ ب ئێكگرتى و ب هيز دچارچۆڤێ دستوورى دا دگشت بواراندا دپێشكه‌فتنه‌كا به‌رده‌وام دا بيت ودووپاتى ل هه‌ماهه‌نگى و ب هێزكرنا په‌يوه‌نديێن هه‌رێمێ وئه‌مريكا كر.
مه‌سرور بارزانى، زێده‌بارى دووپاتكرنێ ل سه‌ر به‌رده‌واميا په‌يوه‌نديێن دناڤبه‌را هه‌رێما كوردستانێ وئه‌مركيا دا، ئاماژه ب وێ چه‌ندێ كر كو هه‌رێما كوردستانێ به‌رده‌وام باوه‌رى ب رێ چاره‌يا ئاشتيانه ودانوستاندني هه‌بوويه بۆ چاره‌سه‌ريا كێشان ل ده‌ڤه‌رێ ونوكه ژى خوازياره دانوستاندنێن دناڤبه‌را به‌غدا وهه‌رێمێ هه‌ر چ زووتره بۆ ئاستێ ئيدارى وسياسى بهێنه ڤه‌گۆهاستن.
شيره‌تكارێ جڤاتا ئاسايشا هه‌رێما كوردستانێ، ئاماژه ب دووماهى ئالۆزيێن له‌شكرى گۆت، بجهئينانا دستوورى ب ئامرازى نه‌دستوورى ناهێته كرن، به‌لكو ب ديالۆكێ ودانوستاندنا راسته‌خوه ولێك تێگه‌هشتنێ دشياندايه چاره‌سه‌ريا گونجاى بۆ كێشان بهێته ديتن.
