مه‌سرور بارزانی: خه‌ونا سه‌رخوه‌بوونێ چو جاران ب دووماهی ناهێت
ئه‌ڤرۆ نيوز:
شیره‌تكارێ جڤاتا ئاسایشا هه‌رێما كوردستانێ د د یداره‌كێ دا ل گه‌ل مالپه‌رێ (ئه‌لمۆنیتۆر) به‌حسێ به‌رده‌وامیا خه‌ونا سه‌رخوه‌بوونا كوردستانێ دكه‌ت و دبێژیت وه‌كو خه‌ونا نه‌ته‌وه‌كی، ب دیتنا من چو جاران ب دووماهی ناهێت.
مه‌سرور بارزانی گۆت ژی” پێدڤیه دواقعبین بین سه‌باره‌ت ئه‌گه‌ران، مه ددیت پێشهاته‌كا گرنگه بۆ جیهانێ و حوكمه‌تا عیراقێ ژی پێدڤیه بزانیت داخوازیا گه‌لێ كورد چیه، له‌وما مه ریفراندۆم ب ڤی شێوه‌ی ئه‌نجامدا، ئه‌م دلته‌نگێن پاشه‌رۆژا گه‌لێ خوه بووین و مه دڤیا پشتراست بین كو چو روو ب رووبوونه‌ك په‌یدا نابیت و په‌یوه‌ندیه‌كا ئاشتیخوازانه و سه‌قامگیر دێ مه ل گه‌ل به‌غدا د چارچۆڤه‌كی دا هه‌بیت كو هه‌ردو ئالی ل سه‌ر بنه‌مایێ به‌رژه‌وه‌ندیا هه‌ڤپشك بڕیارێ ل سه‌ر بده‌ن”.
مه‌سرور بارزانی د پشكه‌كا دی یا دیدارا خوه دا، دیار كر” مخابن ب دیتنا من نیازا گه‌لێ كوردستانێ ب قه‌سد شرۆڤه‌كا شاش بۆ هاته كرن، چونكو راده‌ربڕین ب وێ رامانێ ناهێت كو روو ب رووبوون پێدڤی بیت”.
ل دۆر سزایێن به‌غدا ل سه‌ر هه‌رێما كوردستانێ، مه‌سرور بارزانی كو نوكه ل ئه‌مریكایه و ل گه‌ل به‌رپرسێن بلند یێن ئیدارا ترامپی كۆم دبیت، گۆت” راگرتنا گه‌شتێن نێڤده‌وله‌تی ل فرۆكخانێن هه‌رێما كوردستانێ و سزایێن به‌غدا ل سه‌ر هه‌رێما كوردستانێ، بڕیاره‌كا نه‌دستووری بوو و نابیت فرۆكخانه تێكهه‌لی پرسێن سیاسی بهێنه كرن”.
