مه‌سرور بارزانی: هیڤیدارین ل سالا نوو ب شێوه‌كێ باشتر خزمه‌تا وه‌لاتیێن هه‌رێما كوردستانێ بكه‌ین
ئه‌ڤرۆ:
سه‌رۆكێ حوكمه‌تا هه‌رێما كوردستانێ، مه‌سرور بارزانی، ب هه‌لكه‌فتا سه‌رێ سالا زایینی یا نوو په‌یامه‌كا پیرۆزباهیێ به‌لاڤكر و تێدا راگه‌هاند، ل سالا بۆری سه‌ره‌رای چه‌ندین گرفتێن دارایی و ئاسته‌نگێن دروستكری، حوكمه‌تا هه‌رێما كوردستانێ هه‌موو بزاڤكرن ژ پێخه‌مه‌ت زالبوون ل سه‌ر ئاسته‌نگ و به‌ربه‌ستان و درێژه‌دان ب پرۆسا چاكسازیێ.
ده‌قێ په‌یاما سه‌رۆكێ حوكمه‌تا هه‌رێما كوردستانێ..
ب هه‌لكه‌فتا سه‌رێ سالا زایینی 2022، گه‌رمترین پیرۆزباهیان ئاراسته‌ی سه‌رۆك بارزانی و هه‌موو هه‌ڤنیشتمانیێن كوردستانێ و پێشمه‌رگێن قه‌هره‌مان و هێزێن ئاسایشا ناڤخوه و كه‌سوكار و مالباتێن سه‌ربلندێن شه‌هیدان دكه‌م، هیڤیدارم سالا نوو، هه‌لگرا خێر و خوه‌شیێ و سالا خوه‌شگوه‌زه‌رانیێ و ب دووماهی هاتنا هه‌موو نه‌خوه‌شی و قه‌یران و نه‌هامه‌تیه‌كێ بیت.
سالا بۆری، سه‌ره‌رای چه‌ندین گرفتێن دارایی و ئاسته‌نگێن دروستكری، حوكمه‌تا هه‌رێما كوردستانێ هه‌موو بزاڤكرن ژ پێخه‌مه‌ت زالبوون ل سه‌ر ئاسته‌نگ و به‌ربه‌ستان و درێژه‌پێدان ب پرۆسا چاكسازیێ، هه‌روه‌سا ب هه‌ماهه‌نگی و هاریكاری ل گه‌ل كه‌رتێ تایبه‌ت ژی، چه‌ندین پرۆژێن گرنگ د بوارێ ب هێزكرنا ژێرخانا ئابووری ل سه‌رانسه‌ری هه‌رێما كوردستانێ هاتنه ئه‌نجامدان. هیڤیدارین ب هاریكاریا هه‌موو ئالیه‌كی، ل سالا نوو ژی دا، بشێین ب شێوه‌كێ باشتر، خزمه‌تا وه‌لاتیێن هه‌رێما كوردستانێ بكه‌ین و پرۆژێن نوو ئه‌نجام بده‌ین، ل ڤێرێ ب پێدڤی دزانم سوپاسیا خه‌لكێ خۆراگرێ هه‌رێما كوردستانێ بكه مكو تێگه‌هشتن بۆ ره‌وشا ئابووری یا دژوار هه‌بوو، هیڤیدارین سالا نوو، سالا ب دووماهی هاتنا رۆژێن دژوار و به‌رده‌وامبوونا كاروانێ پێشكه‌فتنا كوردستانێ بیت.
مخابن ل سالا بۆری، چه‌ندین كاره‌ساتێن سروشتی و روودانێن نه‌چاڤه‌رێكری ژی په‌یدابوون كو زیانێن گیانی و مادی ل دووڤ خوه دا ئینان، چه‌ندین پێشمه‌رگێن قه‌هره‌مان ژی، د شه‌رێ به‌رهنگاریا تیرۆرستێن داعشێ و به‌رگریكرنێ ژ ئاخا كوردستانێ شه‌هید بوون. ب ڤێ هه‌لكه‌فتێ ب رێز و پێزانینه‌كا مه‌زن، بیرا خوه ل وان هه‌موویان دئینین و به‌رده‌وام ژی دێ ل بیرا مه بن.
