مه‌سروور بارزانى: رێ بۆ وه‌به‌رهینه‌رێن بیانی ڤه‌كرییه
ئه‌ڤرۆ نیوز:
سه‌رۆكوه‌زیرێن هه‌رێما كوردستانێ هاندانا وه‌به‌رهێنه‌رێن ئه‌مریكى و بیانى كر زێده‌تر وه‌به‌رهێنانێ ل هه‌رێما كوردستانێ بكه‌ن و راگه‌هاند، ئارامى و رێخۆشكرن بۆ وه‌به‌رهێنانا بیانى ل كوردستانێ هه‌یه و هیڤى خواستن د پێنج سالێن بهێن دا كه‌لوپه‌لان بۆ بازارێن ئیراقێ و ده‌رڤه بهنێرن.
مه‌سروور بارزانى پشكدارى د كۆنفرانسێ سالانه یێ ژوورێن بازرگانى یێن ئه‌مریكا و هه‌رێما كوردستانێ كر و به‌حس ل كارێن حكومه‌تا هه‌رێمێ بۆ پێشخستنا ئابوورى و به‌رهنگاربوونا گه‌نده‌لیێ و چاكسازى د كه‌رتێ وزێ دا كر.
مه‌سروور بارزانى ئاشكرا كر، به‌لاڤبوونا ڤایرۆسێ كۆرۆنا كارتێكرن ل ئابوورى گه‌له‌ك وه‌لاتان كرییه و كوردستان ژى ژ وێ یه‌كێ ڤه‌ده‌ر نه‌بوو، لێ ئه‌و ل سه‌ر بزاڤێن خوه به‌رده‌وامن بۆ هاندانا وه‌به‌رهێنانێ و هه‌مه‌جۆركرنا ژێده‌رێن داهاتى و پێشڤه‌برنا كه‌رتێ چاندنێ و زێده‌كرنا سه‌عه‌تێن پێدانا كاره‌با نشتیمانى بۆ وه‌لاتییان.
مه‌سروور بارزانى، سه‌رۆكوه‌زیرێن هه‌رێما كوردستانێ ئاماژه ب وێ یه‌كێ كر، كوردستان دۆستا ئه‌مریكایه و ده‌رگه‌هـ ڤه‌كرینه ئه‌مریكى بهێن وه‌به‌رهێنانێ بكه‌ن، بۆ وێ یه‌كێ ژى هێزێن ئێمناهیێ یێن هه‌رێما كوردستانێ ئێمناهى و ئارامیه‌كا باش به‌رقرار كرییه.
ل گۆره‌ى گۆتنا مه‌سروور بارزانى، هه‌رێما كوردستانێ هیڤى خوازه د پێنج سالێن بهێن دا ئابوورێ خوه ڤه‌ژینیت و كه‌لوپه‌لان بۆ بازارێن ئیراقێ و ده‌رڤه بهنێریت، ئه‌و یه‌ك ژى ب وه‌به‌رهێنان و سیاسه‌تا دروست دێ بده‌ستڤه هێت.
ل دۆر زێده‌كرنا سه‌عه‌تێن پێدانا كاره‌با نشتیمانى ژى مه‌سروور بارزانى گۆت: ئه‌و ب هیڤینه ده‌مه‌كێ نێزیك كاره‌ب بۆ بیست و چار سه‌عه‌تان بۆ وه‌لاتییان دابین بكه‌ن و ئاماژه ب چاكسازى و پێشڤه‌چوونا د وى كه‌رتى دا كر.
