مه‌سرۆر بارزانى: حوكمه‌تا عيراقێ مه‌زنترين پشته‌ڤانا داعشه
ئه‌ڤرۆ نيوز:
مه‌سرۆر بارزانى، شيره‌تكارێ جڤاتا ئاسايشا هه‌رێما كوردستانێ، راگه‌هاند كو عيراق مه‌زنترين پشته‌ڤانا تيرۆرستێن داعشه.
مه‌سرۆر بارزانى د چارچۆڤێ پێشوازيكرنێ د شانده‌كێ رۆژنامه‌ڤانێن كوێتى ل هه‌ولێرێ راگه‌هاند: “داعش ده‌ست ب سه‌ر زريپۆش و ژماره‌كا زۆر ژ چه‌كێ گران و پێشكه‌فتى يێ عيراقێ دا گرتيه”، ئاماژه ب وێ چه‌ندێ ژى كر كو ژ بوو روو ب رووبوونا وان ژى چه‌كه‌كێ ژ ڤان پێشكه‌فتى تر دڤێت.
ئاماژه ب وێ چه‌ندێ ژى كر كو ژناڤچوونا داعش ل سه‌ر وێ چه‌ندێ دمينيت كا دێ چه‌ند ب رژداتى جڤاكا نێڤده‌وله‌تى كار ژ بوو نه‌هێلانا چه‌كدارێن داعش دكه‌ت، ژ لايێ ئايدولۆجى ژى ده‌مه‌كێ درێژ دڤێت و ژ لايێ له‌شكرى ژى ڤه ژ ناڤبرنا وێ نه‌يا ب زه‌حمه‌ته د سه‌ر هندێ كو نه يا ب ساناهى يه.
نه‌ڤه‌شارت ژى كو مه‌زنترين پشته‌ڤان بۆ داعش ب ره‌نگه‌كێ نه‌يێ ئێكسه‌ر حوكمه‌تا عيراقێ يه و گۆت: “داعش ده‌ستێ خوه دانايه سه‌ر چه‌كه‌كێ پێشكه‌فتى ل ده‌مێ ره‌ڤينا له‌شكرێ عيراقێ ژ مووسل”.
