مه‌سعود حه‌یده‌ر:حوكمه‌تا داهاتى دێ به‌رهنگاريا گه‌نده‌ليێ ل هه‌ر جهه‌كێ هه‌بيت كه‌ت
ئه‌ڤرۆنيوز:
ئه‌ندامه‌كێ خۆلا بۆرى يا په‌رله‌مانێ عيراقێ راگه‌هاند، حوكمه‌تا داهاتى يا هه‌رێما كوردستانێ درێژه‌پێده‌ر وتمامكارا حوكمه‌تێن پێشتره وئه‌ركێ وێ يێ سه‌ره‌كى ب هێزكرنا بنه‌مايێ ئابوورێ هه‌رێما كوردستانێ بيت ب ئه‌نجامدانا چاكسازيا ئابوورى وبه‌رهنگاريا گه‌نده‌ليێ ل هه‌ر جهه‌كێ هه‌بوون بۆ هه‌بيت.
مه‌سعود حه‌يده‌ر، ئه‌ندامێ خۆلا بۆرى يا په‌رله‌مانێ عيراقێ دبه‌رپه‌رێ خوه يێ فه‌يسبووكى دا به‌لاڤكر” يا گرنگ ئه‌وه حوكمه‌تا داهاتى يا هه‌رێما كوردستانێ ژ حزبێن ئێكێ ودويێ وسيێ يێن كوردستانێ وپێكهاتان پێك بهێت كو رووبه‌ره‌كێ سياسى يا به‌رفرهه وب هێز دێ ده‌سته‌به‌ر كه‌ن بۆ حوكمه‌تا هه‌رێمێ ودێ وه‌كو فاكته‌ره‌كێ ب هێز بيت وسه‌قامگيريا سياسى ژى ل هه‌رێما كوردستانێ دێ گره‌نتى كه‌ت”.
دياركر” ب هه‌يوونا سه‌قامگيريا ئه‌منى كو هه‌رێما كوردستانێ يا پيشه‌نگه ل ڤێ ده‌ڤه‌رێ وهه‌بوونا سه‌قامگيريا سياسى، هه‌رێما كوردستانێ ل گه‌ل گاڤێن حوكمه‌تا هه‌رێمێ دچار سالێن داهاتى دا، دێ ڤه‌ژاندنه‌كا ئابوورى يا به‌رچاڤ دێ ب خوه‌ڤه بينيت.
مه‌سعود حه‌يده‌ر خوياكر ژى”ئه‌و جوداهيا دبۆچوونێن سياسى ل گه‌ل برايێن ئێكه‌تيا نيشتمانى يا كوردستانى هه‌ى، چاڤه‌رێ دهێته كرن دپاشه‌رۆژه‌كا نێزيك دا بهێته چاره‌كرن وسه‌ركردايه‌تيا سياسى يا هه‌رێما كوردستانێ ب تێروانينه‌كا نيشتمانى وب هه‌بوونا حوكمه‌ته‌كا ب هێز دچار سالێن داهاتى دا، هه‌رێما كوردستانێ دێ ب هێزتر كه‌ت ول ڤێ لڤێنا نێڤده‌وله‌تى ئه‌وا ل ده‌ڤه‌رێ هه‌ى، دێ به‌رژه‌وه‌نديێن هه‌رێما كوردستانێ ده‌سته‌به‌ر كه‌ت ودێ كوردستانه‌كا ب هێز بين ژروويێ سياسى وئه‌منى وئابوورى”.
