مه‌سيحيه‌كێ زاخۆ دبيته ئه‌ندامێ ده‌سته‌يا كاردينالێن فاتيكان
ئه‌ڤرۆنيوز:
برياره ل ڤێ هه‌يڤێ ده‌سته‌يه‌كا نوو يا كاردينالان بۆ فاتيكان بهێته دياركرن، بۆ ڤێ مه‌ره‌مێ ژى 14 كه‌س يێن هاتينه هه‌لبژارتن كو ببن كاردينال كو دناڤ واندا مه‌سيحيه‌كێ خه‌لكێ زاخۆ يێ هاتيه ده‌ست نيشانكرن وه‌كو ئێكه‌م كه‌س ناڤێ وى هاتيه خواندن ببيته كاردينال.
ل دووڤ مالپه‌رێ كوردستان تى ڤى، برياره د رێ وره‌سمه‌كى دا ب به‌رهه‌ڤبوونا پاپايێ فاتيكانێ، ل رۆژێن 28 و29 ڤێ هه‌ڤێ پلا كاردينال بۆ 14 كه‌سان بهێته دان كو دێ بنه هاريكارێن پاپايێ فاتيكانێ.
دهه‌لبژارتنا وان 14 كه‌سان دا كو ئێك ژوان مه‌سيحيه‌كێ خه‌لكێ زاخۆيه ب ناڤێ (مار لويس روفائيلێ ئێكێ ساكۆ).
ده‌سته‌يا كاردينالان ناڤه‌نده‌كا فه‌رمى يه ل ئه‌سقوفيا كاسۆليكى يا ئايينێ مه‌سيحى، هه‌روه‌سا ل ده‌مێ مرنا پاپايێ فاتيكانێ، ده‌سته‌يا كاردينالان پاپايێ نوو دهه‌لبژێرن.
مار لويس روفائيلێ ئێكێ ساكۆ ل سالا 1948 ل باژێرێ زاخۆ ژدايكبوويه، ل 1963 بوويه قوتابى ل په‌يمانگه‌ها ماريوحه‌نا حه‌بيب ل مووسل ول سالا 1974 بوويه قه‌شه ل مووسل، هه‌لگرێ دو باوه‌رنامێن دكتۆرايێ يه ل رۆما وزانۆيا سۆربۆن ل فه‌ره‌نسا، هه‌روه‌سا هه‌لگرێ باوه‌رنامه ماسته‌رێ يه دفقهێ ئيسلامى دا.
