مه‌لايه‌كێ دهۆكێ دێ هێته دادگه‌هكرن
ئەڤرۆ نیوز، ئەمیر ئەترووشی:
رێڤەبەرێ ئەوقافا دھۆکێ راگەھاند، ئەو کەسێ بەری چەند رۆژەکا ل نڤێژا سپێدێ دوعا بۆ داعش کرین یێ ھاتیە دەستەسەرکرن و ڤەگوھاستن بۆ دادگەھێ، بەلێ ئەو رەت دکەت کو مەبەستا وی ژ وان دوعایان داعش بیت.
مەلا جیھاد بێسفکی، رێڤەبەرێ ئەوقافا دھۆکێ بۆ ئەڤرۆ نیوز دیار کر، پشتی دووڤچوونا وی کەسی ھاتیە کرن دیار بوو ئەو کەسە نە مەلا و پیاوێ ئاینی یە و سەر ب چو پارت و لایەنان و ئەوقافێ ڤە نینە، ب تنێ کابرایەکێ دیندارە و دچیتە نڤێژێن ب جوماعەت و ریھێن خوە ژی بەرداینە و گۆت: وی کەسی نڤێژەکا سپێدێ ل مزگەفتا (ع) ب دەلیڤە دیتبوو کو کەس نەبوو نڤێژا سپێدێ بەری نڤێژکەران بکەت و د روکعەتا دویێ یا نڤێژێ دا د دوعایێن قنوتێ دا گۆتیە : “اللهم انصر اخواننا المجاهدين في العراق والشام”.
ناڤبری دیار کر کو پشتی ھینگی ئەڤ کەسە ئێکسەر ھاتیە دەستەسەرکرن و رەوانەکرن بۆ دەزگایێن ئێمناھیێ و پاشی بۆ دادگەھێ و دێ ھێتە دادگەھکرن و گۆت: ھەر چەندە ڤی کەسی رەتکریە کو مەبەستا وی ژ وێ دوعایێ داعش بیت، ب تنێ وی ئەو دوعاتیە گوھلێبوویە و ھوسا ڤەگێرایە.
مەلا جیھاد ئاماژە دا وێ چەندێ کو ژ بەر ڤێ چەندێ مە ل رۆژا پێنچشەمبی کومبوونەک ل گەل ماموستایێن ئاینی کر و تەکەست ل سەر ھندێ کر کو گرنگیێ ب ھزرێن نەتەوەیی ژی بدەن.
