موحسن سه‌عدون: عه‌بدولمه‌هدى يێ نه‌چاره داخوازيێن گه‌لێ كوردستانێ بجهبينيت
ئه‌ڤرۆنيوز:
ئه‌ندامێ شاندێ پارتى ديموكراتى كوردستان ل به‌غدا، موحسن سه‌عدون، راگه‌هاند دانوستاندنێن پێكئينانا حوكمه‌تا عيراقى يا نوو دبه‌رده‌وامن وحوكمه‌تا نوو يا نه‌چاره داخوازيێن گه‌لێ كوردستانێ بجهبينيت.
موحسن سه‌عدون ئه‌ندامێ شاندێ پارتى ل به‌غدا گۆت” عادل عه‌بدولمه‌هدى كو هاتيه راسپاردن ب پێكئينانا حوكمه‌تا نوو دخوازيت سيسته‌مه‌كێ نوو په‌يره‌و بكه‌ت بۆ پێكئينانا حوكمه‌تێ ودڤێت خه‌لك ب خوه حوكمه‌تێ دروست بكه‌ت، به‌لێ ئه‌ڤه ل گه‌ل واقعێ عيراقێ وئه‌نجامێن هه‌لبژارتنان ناگونجيت، چونكى فراكسيۆن هه‌يه زێده‌تر ژ 50 كورسيان ل په‌رله‌مانى يێن هه‌ين ونابيت بهێته بێ به‌هركرن ژ پۆستێن وه‌زارى.
موحسن سه‌عدون زێده‌تر دداخۆيانيه‌كا رۆژنامه‌ڤانى دا گۆت” ئه‌ڤه ل چو وه‌لاته‌كێ جيهانێ نه‌بوويه، ل وه‌لاتين ديموكراتى ژى كارێ ب ڤى شێوه‌ى روونه‌دايه، له‌وما ئه‌و ميكانيزمه ل عيراقێ يا سه‌ركه‌فتى نابيت وپه‌رله‌مان ژى باوه‌ريێ ناده‌ته وێ حوكمه‌تێ، هه‌كه عه‌بدولمه‌هدى ب وى شێوه‌ى يێ به‌رده‌وام بيت، كابينا وه‌زارى يا وى ل په‌رله‌مانى دێ شكه‌ستنێ ئينيت وپێدڤيه لايه‌نێن سياسى رازى بكه‌ت په‌رله‌مان ده‌نگى پێ بده‌ت”.
دياركر” ل حوكمه‌تا نوو هه‌ر لايه‌نه‌ك ب گۆره‌ى هژمارا كورسيێن خوه ره‌فتاردگه‌لدا بهێته كرن، ئه‌و لايه‌نێ پێنج كورسى هه‌بن پۆستێ وه‌زاره‌تێ وه‌رناگريت، به‌لێ وه‌كو پارتى دێ دو وه‌زاره‌تێن خزمه‌تگوزارى ووه‌زاره‌ته‌كا سيادى وه‌رگرين”.
ئاشكراكر ژى”ئه‌م ل گه‌ل عادل عه‌بدولمه‌هدى ددانوستاندنێن به‌رده‌وام داينه وپێدڤيه ئه‌وژى ب زووترين ده‌م به‌رنامێ حوكمه‌تا خوه ئاشكرا بكه‌ت، چونكى مه داخوازيێن خوه يێن هه‌ين وپۆست ل ده‌ف مه دگرنگ نينن، ئه‌وا گرنگ بجهئينانا داخوازيێن كوردستانێ نه، چونكى كورد هژماره‌كا مه‌زنه دپرۆسا سياسى دا ل عيراقێ وعه‌بدولمه‌هدى نه‌چاره مامه‌لێ بكه‌ت، به‌رۆڤاژى دێ مه هه‌لويست هه‌بيت”.
