موفتيه‌ك: شیعە کافرن و پێکئینانا ژیانا ھەڤژینیێ ل گەل وان حەرامە
ئەڤرۆ نیوز، ئەیاد بەرواری:
موفتیێ لیبیا ل دووڤ ھندەک بەلگەنامێن فەرمی یێن وەزارەتا کاروبارێن جڤاکی، پێکئینانا ژیانا ھەڤژینیێ ل گەل شیعان ل وەلاتیێن لیبی حەرام دکەت.
ل دووڤ وان بەلگەنامێن لیبی، دیار دبیت کو وەزیرێ داد یێ د حوکمەتا بەروەخت یا لیبی دا ب نڤیسارەکێ داخوازا بوچوونا شەرعی ژ موفتیێ بلند یێ لیبیا ( سادق عەبدولرەحمان ئەلغریانی) دکەت د پرسا پێکئینانا ھەڤژینیێ ل گەل شیعان.
د بەرسڤێ دا، موفتیێ لیبیا، فەتوایێ ددەت و دبێژیت” پێکئینانا ژیانا ھەڤژینیێ ل گەل (قادریان و درۆزا و شیعان) یا حەرامە و وان ب (نە ژ خەلکێ موسلمان) د ھەژمێریت.
موفتیێ لیبیا داخواز ژ وەزارەتا داد کر کو پتر پێرابوونان وەرگریت بۆ نەھێلانا حالەتێن پێکئینانا ھەڤژینیێ ل گەل شیعان ل لیبیا.
دھێتە زانین کو ئەڤە نە جارا ئێکێ فەتوایێن حەرامکرنا پێکئینانا ھەڤژینیێ ل گەل شیعان دھێتە دەرکرن، بەری نوکە ژی زانایێ ئایینیێ سعودی ( ئەلعریفی) کو دھێتە ھژمارتن ئێک ژ مەزنترێن شێخێن وەھابیەتێ، شووکرنا ژنا سونی ب زەلامێ شیعی حەرام کربوو.
