مووچێ هنده‌ك خانه‌نشينان دێ هێته راگرتن
ئه‌ڤرۆنيوز:
سه‌رۆكێ ده‌سته‌يا ده‌ستپاكيێ ل هه‌رێما كوردستانێ ئاشكراكر كو وان داخوازكريه ئه‌و برياره بهێته هه‌لوه‌شاندن كو كه‌سێن ب نه‌شايسته پێ هاتينه خانه‌نشينكرن، به‌لێ حوكمه‌تێ پێ باشه ب قانوون مووچێن وان كه‌سان بهێته برين كو شايسته نينن، له‌وما ل قۆناغا ئێكێ دێ مووچێن وان كه‌سان هێته راگرتن ئه‌وێن ب شێوه‌كێ نه‌قانوونى هاتينه خانه‌نشينكرن.
ئه‌حمه‌د ئه‌نوه‌ر، سه‌رۆكێ ده‌سته‌يا ده‌ستپاكيێ ل هه‌رێمێ راگه‌هاند” بۆ وان كه‌سێن كو ب شێوه‌كێ نه‌قانوونى هاتينه خانه‌نشينكرن وپلێن له‌شكرى ب شێوه‌كێ نه‌قانوونى وه‌رگرتين، دێ ژێ هێنه وه‌رگرتن، به‌لێ پاشى هه‌تا قانوونا برينا مووچه وپله‌يان وچاكسازيێن حوكمه‌تێ ده‌ستپێ دكه‌ن، دێ مووچێن وان ژى هێنه راگرتن”.
ئه‌نوه‌رى زێده‌تر بۆ دوارۆژ گۆت” برياره ل ڤان نێزيكان ل گه‌ل ديوانا چاڤدێريا دارايى وپه‌رله‌مانى كۆمبوونه‌كێ ئه‌نجام بده‌ين دا ميكانيزما برينا مووچێن كه‌سانێن نه‌شايسته ڤه‌گريت”ظ
سه‌رۆكێ ده‌سته‌يا ده‌ستپاكيێ رۆهنكر ژى” هه‌ر كه‌سه‌ك ب شێوه‌كێ نه‌قانوونى هاتبيته خانه‌نشينكرن، دێ هووربينى دباده‌كا وى دا هێته كرن، هه‌كه دياربوو ب نه‌قانوونى يێ هاتيه خانه‌نشينكرن، دێ مووچێ وى هێته برين، چونكى دقانوونا خانه‌نشينيێ دا، مه‌رج ب رۆهنى يێن تێدا هاتينه به‌حسكرن”.
