مووچێ پێشمەرگەیی ناھێتە زێدە کرن
ئەڤرۆ:
بڕیاردەرا لژنا پێشمەرگەی ل پەرلەمانێ کوردستانێ بھار عەبدولڕەحمان بۆ ئەڤرۆ گۆت پەرلەمانی بڕیارا ھژمارە ١٩ بۆ زێدەکرنا مووچێ پێشمەرگەی و خۆشکرنا ژیانا وان دەکریە، بەلێ ھەر د وێ بڕیارێ دا خالەک ھاتیە کو ل وی دەمی حوکمەت یا پێگیرە ھەکە پارە ھەبیت، مە رەوشا دارایی یا ھەرێمێ ل بەرچاڤ وەرگرتیە، لەوڕا تێدا ھاتیە پشتی قەیرانا دارایی دێ ھەموو خالێن بڕیارا ھژمار ١٩ ھێنە بجە ئینان، ئەو ژی دیارکر کو پرۆژە قانوونەک ھاتیە بەرھەڤ کرن و خواندنا ئێکێ بۆ ھاتیە کرن کو مووچێ پێشمەرگەی ٢٠٠ ھزار دینار ب شێوەیەکی دەمکی بھێنە زێدە کرن، ھێشتا پڕۆژە یا ددەستێ لژنێن تایبەتمەندا و خواندنا دویێ بۆ نەھاتیە کرن ھەتا بھێتە پەسەند کرن.
بھار عەبدولڕەحمان گۆت ژی ھەکە ئاریشە د ناڤبەرا ھەرێمێ و بەغدا دا نەبوون و رێکەفتنا ھاتیەکرن کەفتە د بیاڤێ بجە ئینانێ دا، دێ مووچێ پێشمەرگەی ھێتە زێدەکرن وەکو د بڕیارا پەرلەمانی دا ھاتیە ژ ٧٠٠ ھزارا کێمتر نەبیت، پشتی ھنگی دێ پرۆژە قانوونەک ھێتە بەرھەڤکرن و مووچێ پێشمەرگەی دێ وەکو یێ ھێزێن ناڤخۆ و ئاسایشێ ھێتە زێدەکرن.
