مێرکل: ھەرێما کوردستانێ ھەڤپەیمانا مە یا سەرەکی یە
ئەڤرۆ نیوز:
شیرەتکارا ئەلمانیا د کۆمبوونا وەلاتێن ئێکەتیا ئورۆپا دا ل بروکسەلێ راگەھاند کو شەرێ ل دژی داعشێ و رێکخراوێن دی یێن تیرۆرستی نھا مژارا سەرەکی یا ھەموو جیھانێ یە و ژ بەر ھندێ ژی دڤێت وەلاتێن ئێکەتیا ئورۆپا د شەرێ ل دژی تیرۆرێ دا خوەدان رۆلەکی سەرەکی بن و ئەم ھەرێما کوردستانێ وەک ھەڤپەیمانا خوە یا سەرەکی د شەرێ ل دژی داعشێ دا دبینین.
ئەنجێلا مێرکل شیرەتکارا ئەلمانیا د کۆمبوونا وەلاتێن ئورۆپا دا راگەھاند کو جیھان تووشی مەترسیا تیرۆرێ بوویە و رۆژ ب رۆژێ ژی چالاکیێن تیرۆرستان ل جیھانێ زێدە دبن، چالاکیا ل پاریسێ نیشا ددەت کو مەترسیا تیرۆرێ ل سەر ئورۆپا زێدەتر بوویە و رەنگە ل گەلەک وەلاتێن دی یێن ئێکەتیا ئورۆپا ژی چالاکیێن وەسا بھێنە کرن، ئەو چالاکی نیشا ددەن کو تیرۆرێ بەرێ خوە دایە ئورۆپا و دخوازیت دیموکراسیا ئورۆپا ژناڤ بەت، ژ بەر ھندێ ژی دھێتە خواستن کو ھەموو وەلاتێن ئێکەتیا ئورۆپا ب رەنگەکێ مەزن شەرێ تیرۆرێ بکەن و ژ بۆ دوورخستنا تیرۆرێ ژ ئورۆپا ژی دڤێت پتر ھاریکاریا وان ھێزان بھێتە کرن کو نھا د بەرەیەکێ پێشیێ دا شەرێ داعشێ دکەن و گۆت: (کوردان پتر ژ ھەر ھێزەکا دی شەرێ تیرۆرێ کریە و قوربانی داینە، لێ شیاینە کو تیرۆرێ بدەنە راگرتن و دربێن مەزن ل وان بدەن، ژ بەر ھندێ ژی دھێتە خواستن کو پتر ھاریکاریا وان بھێتە کرن، چونکو ئەو پێدڤی ب ھاریکاریێ نە و ھەکە ئەم ھاریکاریا وان نەکەین تیرۆر دێ گەشە کەت و ھەکە گەھشتە بەر دەرگەھێ مە ئێدی نەشێین ب ساناھی ژناڤ بەین و ژ بەر ھندێ ژی دھێتە خواستن ئەم ب رەنگەکێ باش ل تیرۆرستان بدەین و وان ژناڤ ببەین).
شیرەتکارا ئەلمانیا سەبارەت ب رۆلێ کوردان ئەو یەک ژی دیار کر کو ئەم ھەرێما کوردستانێ د شەرێ ل دژی داعشێ دا وەک ھەڤپەیمانێن خوە یێن سەرەکی دبینن و دێ ھاریکاریێن مە بۆ کوردان بەردەوام بیت، چونکو ھێزێن کوردی شیان ب چەکێن گەلەک سڤک و کێم رێگریێ ل داعشێ بگرن و نھا پرانیا ئاخا خوە ژ دەستێ داعشێ ئازاد کریە، ئەو یەک ژی جھێ شانازیێ یە بۆ ھەموو جیھانێ و دھێتە خواستن کو ھاریکاریا مە بۆ کوردان بەردەوام بیت و گۆت: (دڤێت وەلاتێن ئێکەتیا ئورۆپا پتر ھاریکاریا کوردان بکەن و خوەدان رۆلەکێ سەرەکی بین د ژناڤبرنا داعشێ دا، چونکو ھەکە ئەم وێ رێکخراوێ و گرۆپێن دی یێن تیرۆرستی لاواز نەکەین دێ چالاکیێن وان ل ئورۆپا رۆژ ب رۆژێ زێدەتر لێ ھێن، ژ بەر ھندێ ھەکە ئەم ب رەنگەکێ باش ھاریکاریا کوردان بکەین ئەو دشێن داعشێ لاواز بکەن و ژناڤ ببەن).