مەترسیا دووبارەبوونا ئەزموونا حەشدا شەعبی ل لوبنانێ یا ھەی

بەرھەڤکرن، ئەیاد بەرواری:
ھژمارەکا سیاسەتمەدارێن لوبنانی ھۆشداری ل دۆر داخۆیانیێن ڤێ دووماھیێ یێن سەرۆکێ لوبنانێ میشێل عەون سەبارەت چەکێ حزب اللە یا لوبنانی دان کو ئەڤ میلیشیا شیعی یا چەکدار ببیتە حەشدا شەعبی یان پاسدارەکا دی، ب تایبەتی ژی چەکێ حزب اللە بەردەوام جھێ ناکۆکیێ یە د ناڤبەرا لوبنانیان دا.
سەرۆکێ لوبنانی پشتەڤانیا خوە بۆ ھەبوونا چەکێ حزب اللە د ڤێ قۆناغێ دا بۆ بەرھنگاربوونا ئیسرائیلێ دیار کر، ھەرچەندە نەتەوێن ئێکگرتی ل حەفتیا بۆری داخوازەکا خوە ل دۆر ڤەکێشانا چەکێ ژ حزب اللە دووبارە کر و ھەبوونا وی چەکی وەکو گەفەک ل سەر جێگیربوونا لوبنانێ ھژمارت، ھەڤدەم ( ئێلی مەحفوز) ئێک ژ سەرکردێن ھێزێن 14 ئادارێ، ھۆشداری دا کو میلیشیا حزب اللە یا لوبنانی یا ھەڤسوز ل گەل ئێرانی، ببیتە حەشدا شەعبی، یان پاسدارەکا دی، ل دووڤ راپۆرتەکا ئاژانسا ئەنادۆل یا تورکی.
ناڤبری دیارکر کو د کۆمبوونەکا سەرکردێن لوبنانی ل جڤاتا نوونەران و ل کۆچکا کۆماری ل دۆر گەفا ھەبوونا چەکی ژدەرڤەی چارچۆڤێ دەولەتێ، حزب اللە دانوستاندن بەر ب ئاقارەکێ دی برن.
خوەیا کر ژی، ژ بەر چەکێ حزب اللە، تیما 14 ئادارێ چەندین تاوان یێن کرین، دیسا پێنج چەکدار و سەرکردێن حزب اللە ل بەرامبەری دادگەھێن نێڤدەولەتی د تۆمەتبارن ب تیرۆرکرنا سەرۆک وەزیرێن لوبنانی یێ بەرێ رەفیق حەریری.
ھەڤڕکی د مەیدانا سیاسی یا لوبنانی دا د ناڤبەرا تیما 14 ئادارێ ب سەرکێشیا سەعد حەریری سەرۆک وەزیران و سەرۆکێ رەوتێ موستەقبەل، کو سعوودیە پشتەڤانیێ لێ دکەت، و تیما 8 ئادارێ ب سەرکێشیا حەسەن نەسروللا سەرۆکێ حزب اللە، کو ئیران پشتەڤانیێ لێ دکەت یا ھەی.
ئێلی مەحفوز ترسا خوە ژ پرسا شەعیەتبوونا چەکێ حزب اللە و حزبا ناڤبری وەکو پاسدارێن ئیرانێ و حەشدا شەعبی یا عیراقی لێ بھێت و گۆت، پێدڤیە ھێزێن 14 ئادارێ رێزێن خوە رێکبێخن.
سەعد حەریری، سەرۆک وەزیرێن لوبنانێ د پەیڤا خوە دا د بیرەوەریا 12ێ یا تیرۆکرنا بابێ وی رەفیق حەریری گۆت، ناکۆکیەکا دژوار ل لوبنانێ یا ھەی ل دۆر چەکێ حزب اللە و رۆلێ چەکدارێن وێ حزبێ ل سووریێ و چو لھەڤھاتن ل جڤاتا نوونەرێن لوبنانی و جڤاتا وەزیران ل دۆر وێ پرسێ نینە.
حزب اللە یا لوبنانی کو ئیران پشتەڤانیا وێ دکەت، شەڕی ل سەر ئاخا سووریێ مل ب ملێَ پاسدارێن ئیرانی دکەت بۆ پشتەڤانیا بەشار ئەسەدی.

کۆمێنتا تە