مەترسیا کۆدەتایا سەربازی ل تورکیا یا ھەی
ئەڤرۆ نيوز:
ئاژانسا سپۆتینگ یا روسیا د راپۆرتەکێ دا دیار کریە کو ناڤەندا ڤەکۆلینێن رۆژھەلاتا ناڤین ل ئەمریکا راپۆرتەک ل سەر رەوشا ناڤخوەیی یا تورکیا بەلاڤ کریە و د راپۆرتێ دا ھاتیە دیار کرن کو ناکۆکیێن د ناڤبەرا ئاکپارتیێ رۆژ ب رۆژێ زێدە دبن و ھەر وەسا شەرێ کو نھا ل باژێرێن باکورێ کوردستانێ برێڤە دچیت وەسا کو لەشکرێن تورکیا ژ سیاسەتا ئەردۆگانی نەرازی بن، نھا ژی دەنگێ نەرازیبوونێ د ناڤ ھێزێن لەشکری دا ھەیە و ژ بەر ھندێ ژی رەنگە سەرباز ل دژی ئەردۆگانی کۆدەتایا سەربازی بکەن.
د بەردەوامیا راپۆرتێ دا ھاتیە دیار کرن کو ئەردۆگانی د ڤان سالێن دووماھیێ بودجێ لەشکران گەلەک کێم کر و ب پارێن وان کۆچکێن مەزن بۆ خوە ھەڤالێن نێزیکی خوە دروست کرن و گەندەلی د ناڤ کاروبارێن حوکمەتێ دا رۆژ ب رۆژێ بەر ب زێدەبوونێ ڤە دچیت، چونکو چو پارتەکا بەرھنگاریێ یا ب ھێز ل تورکیا نینە کو بشێت ل ھەمبەر ئەردۆگانی راوەستیت ژ بەر ھندێ ژی مەترسیا کۆدەتایا سەربازی ل تورکیا یا ھەی.
د دووماھیا راپۆرتێ دا ھاتیە دیار کرن کو لەشکرێ تورکیا دزانیت کو نەشێت ب شەری کوردان ژناڤ ببەت و ئەو دزانن کو ئەردۆگان نھا لەشکری بۆ بەرژەوەندیێن خوە و پارتا خوە بکار دئینیت و ژ بەر ھندێ ژی ئەو ژ ئەردۆگانی توورە نە و رەنگە کۆدەتایێ ل دژی حوکمەتا ئاکپارتیێ بکەن.
