مەحما خەلیل: مەترسییا دوبارە پێكدادانێ د ناڤبەرا یەپەشێ و لەشكرێ ئیراقێ دا ل شنگالێ یا هەی
لەزگین جوقی:
ل شەڤا 21 ل سەر 22 ئادارا 2025، لەشكرێ ئیراقێ ب رێكا بكارئینانا هێزێ، هەموو كەپر و خیڤەتێن گرۆپێن چەكدار ل بەرامبەری ئاڤاهیێ جڤاتا ئاسایشا نیشتمانی و دەزگەهێ هەواڵگیرییا ئیراقێ ل شنگالێ لادان و پەكەكێ ژی بەرهەڤی نیشادایە ل گەل لەشكرێ ئیراقێ كۆمببیت.
گروپێن چەكدار ل قەزا شنگالێ پشكەكا مەزن یا لایەنگرێن خوە برنە بەرامبەر ئاڤاهیێ ئاسایشا نیشتمانییا ئیراقێ و دەزگەهێ هەواڵگیرییا ئیراقی كو هەموو پشكداربووی ژن و سنێلە بوون و خیڤەت هەلدابوون دگەل هندەك كەپران، بەلێ ل سات دویێ شەڤێ لەشكرێ ئیراقێ ب رێكا بكارئینانا هێزێ، هەموو خیڤەت لادان و خەلك دەرئێخست، پاشی ئیدارەیا پەكەكێ بەرهەڤییا خوە بۆ دانوستاندنێ ل گەل لەشكرێ ئیراقێ نیشادا.
مەحما خەلیل، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ژ پشكا شنگالێ، گوت « بەری چەند رۆژێن كێم هێزەكا مەزن یا لەشكرێ ئیراقێ یا هاتیە شنگالێ و بەرهەڤی نیشادایە بۆ هەر حالەتەكێ، ژ ئالییەكێ دی ژی (یەپەشێ) بەرهەڤی نیشادایە هەكە پێنج گرتیێن وان نەهێنە ئازادكرن، وەك لەشكرێ داگیركەر دێ سەرەدەریێ ل گەل لەشكرێ ئیراقێ كەن، ب كورتی ترسا پێكدادانێ ل شنگالێ یا مای“
مەحما خەلیلی گوت ژی «مخابن دڤان شەڕاندا هەر خەلكێ ئێزدی و سڤیل یێن شنگالێ دبنە قوربانی، بكارئینانا ژن و زاروك و گەنجێن ئێزدی وەك قەڵغانا مرۆڤی یا مەترسیدارە و ئەڤە بكارئینانا گیانێ خەلكێ سڤیلە بۆ مەرەمێن سیاسی».
دهێتە زانین ل 18 ئادارێ، لەشكرێ ئیراقێ ل تاخێ یەرمووك ل ناڤەندا باژێرێ شنگالێ، پۆسەیەك بۆ ترۆمبێلەكا شەڕڤانێن (یەپەشێ) دانابوو و د ئەنجامدا ترۆمبێلا وان گولـەبارانكر و ب ئەگەرێ وێ كریارێ سێ شەڕڤانێن سەر ب یەپەشێ ڤە بریندار بوون وی ڕەوشا ساخلەمیا ئێك ژ وان یا جهگیر نینە.
ئەڤ چەندە ژی هات پشتی رەڤاندنا ئەندازیارەكی ژئالیێ هێزێن (یەپەشێ) كو دخواستن ژ سنۆرێ لەشكرێ ئیراقێ دەرباز بكەن.
