مەسرور بارزانی: ئیراقێ پێدڤی ب حوكمڕانییەكا دادپەروەرانە هەیە
دوهی دوشەمبی 5/5/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ جڤاتا نوونەرێن ئیراقێ كر كو ژ ئەندامێن لیژنەیا ئابووری و پیشەسازی و بازرگانی پێكهاتبوو.
ب گۆڕەی بەیاننامەیەكا حوكمەتا هەرێما كوردستانێ» د كۆمبوونەكێدا دوپاتی ل گرنگییا پێشڤەبرنا هەماهەنگیێ و هاریكاریێ د ناڤبەرا هەرێما كوردستانێ و جڤاتا نوونەران و حوكمەتا فیدرالیدا هاتە كرن. ب تایبەتی د وارێن پشتەڤانیكرنا وان پڕۆژە قانوونێن د بەرژەوەندییا هەموو هەڤوەلاتی و پێكهاتەیێن ئیراقێدا».
د پشكەكا دی یا كۆمبوونێدا» دوپاتی ل پێدڤییا ئازادییا لێكگۆهارتنا بازرگانی و لڤینا كەلوپەلان د ناڤبەرا هەموو دەڤەرێن ئیراقێدا و نەهێلانا هەر بەربەست و ئاستەنگەكێ سەبارەت وێ چەندێ، هاتە كرن».
ل دووڤ بەیاننامەیا حوكمەتا هەرێمێ» گەنگەشە ل دۆر گرنگییا پڕۆژەیێ رێكا گەشەپێدانێ و گرێدانا وەلاتێن كەنداڤی و ئیراقێ و هەرێما كوردستانێ ب توركیا و ئۆرۆپا ڤە ب رێكا هێلا ئاسنی هاتە كرن و دوپاتی ل پشكداری و مفاوەرگرتنا هەرێما كوردستانێ و هەموو دەڤەرێ و پێكهاتەیێن ئیراقێ ژ وی پڕۆژەیێ گرنگ هاتە كرن».
سەرۆكێ حوكمەتا هەرێما كوردستانێ دوپاتكر» پێدڤییە رێز ل سیستەمێ فیدرالی و دستوورێ ئیراقێ بهێتە گرتن كو ماف و ئەركێن هەر ئالییەكی یێن دەستنیشان كرین».
مەسرور بارزانی هەروەسا ئاماژە ب وێ چەندێ كر» ئیراق ژ روویێ مادی و مرۆڤی ڤە،وەلاتەكێ زەنگینە و خودان پێگەهەكێ جیۆپۆلیتیكیێ گرنگە ژی و تنێ پێدڤی ب حوكمڕانی و بڕێڤەبرنەكا باش و دادپەروەرانە یا هەی كو رێز ل مافێن هەموو دەڤەر و گشت پێكهاتەیێن ئیراقێ بهێتە گرتن».
