مەسرور بارزانی: ب هێزبوونا پارتی ب هێزبوونا كوردستانێیە
ب مەبەستا بەرچاڤكرنا دووماهی پێشهاتێن سیاسی و هەلسەنگاندنا رەوشا نوكە و بەرچاڤرۆهنییا زێدەتر بۆ ئەرك و پێنگاڤێن داهاتی، مەسرور بارزانی، جێگرێ سەرۆكێ پارتی دیموكراتی كوردستان، ل گەل هەژمارەكا كادرێن لقێن 2 و 16 و 23 و 24 ل سنۆرێ پارێزگەها هەولێرێ كۆمبوو.
د كۆمبوونێدا، كو بەرپرس و ئەندامێن دەستەیا كارگێری و هەژمارەكا ئەندامێن مەكتەبا سیاسی و كۆمیتەیا ناڤەندییا پارتی بەرهەڤ بووین، مەسرور بارزانی دوپاتكر كو پارتی وەكو حزبەكا بەرپرسیار و نوونەرا راستەقینەیا دۆزا رەوایا خەلكێ كوردستانێ، هەروەكو چاوزان پێشتر و نوكە جهێ باوەریێ و ئومێدێ و داینەمۆیا پاراستنا كوردستانێ و ئارامییا وێ بوو، ب هەمان شێوە ب رێبەرییا (سەرۆك مەسعود بارزانی) ب باوەری ب خوەبوونا تمام و ب پشتەڤانییا خودایێ مەزن و هیمەتا جوامێرانە و دلسۆزانەیا هەموو كادر و ئەندام و لایەنگرێن وێ و خەلكێ دلسۆزێ كوردستانێ، بۆ زێدەتر پاراستنا قەوارەیێ دستووریێ هەرێما كوردستانێ و زێدەتر گەشەپێدان و درێژەپێدانا چاكسازیێ، دێ د خەباتێدا بەردەوام بیت.
جێگرێ سەرۆكێ پارتی دیموكراتی كوردستان، دوپاتكر كو دڤێت هەڤالێن پارتی، ژ هەموو كەس و ئالییەكێ دی زێدەتر هەەست ب ئەرك و بەرپرسیارەتییا مەزن یا ل سەر ملێ خوە بكەن، ب كریار ژی دوپاتی بكەن بۆ كوردستانەكا ب هێز و سەقامگیر و پێشكەفتی و حوكمڕانییەكا سەرانسەرییا خزمەتگوزار پێنگاڤان ب هاڤێژن.
جێگرێ سەرۆكێ پارتی هەروەسا گۆت : پێدڤییە و دڤێت ب پشتەڤانییا خەلكی، پارتی ب هێز بیت و ل ئاستێ ئەوێ باوەرییا خەلكیدا بیت كو د پرۆسەیێن دیموكراسیدا، جەماوەرێ كوردستانێ ب پارتی د بەخشن و پاراستنا ئارامی و سەقامگیرییا جڤاكییا خەلكێ كوردستانێ ل ستوویێ كادرێن پارتییە و دڤێت ل ئاستێ ئەوێ بەرپرسیارەتیێ بن، چونكە ب هێزبوونا پارتی ب هێزبوونا كوردستانێیە.
