مەسرور بارزانی د ئێكەمین دیدارا لاوان دا ل دهۆكێ: پێدڤیە حوكمەتا هەرێمێ دەلیڤەیان بۆ گەنجان پەیدا بكەت تاكو پاشەڕۆژەكا باشتر بۆ خوە ئاڤا بكەن
ئەڤرۆ
سەرۆكێ حوكمەتا هەرێما كوردستانێ، مەسرور بارزانی پشكداری د ئێكەمین دیدارا لاوان ل دهۆكێ كر و تێدا باسێ ژیانا چەند ئالیێن لاوێن كوردستانێ كر و ڕاگەهاند: ئەوێ شارەزایی د دیرۆكا خوە دا نەبیت نەشێت پاشەڕۆژەكا باشتر بۆ خوە ئاڤا بكەت.
سەرۆكێ حوكمەتا هەرێما كوردستانێ، ئاماژە ب وێ چەندێ ژی كر، ل سەردەمێ چیای پێشمەرگەی هیڤی دخواستن ب ئازادی ل كوردستانێ بژین هەكە ل بن تراشەكێ ژی دا بیت، نوكە كوردستان یا ئازادە و ژ هەموو ئیراقێ یا ئاڤەدانترە.
دەقێ پەیڤێن سەرۆكێ حوكمەتا هەرێما كوردستانێ:
ڕۆژێن سەرهلدانێ و ئازادكرنا باژێر و باژێركێن كوردستانێ ل هەموو خەلكێ كوردستانێ پیرۆز دكەم، هەلكەفتەكا مەزن و پیرۆزە بۆ ڕزگاركرنا گەلێ مە ژبن دەستێ زۆرداریێ و وەرچەرخانەیەكا دیرۆكی بوو د ژیانا هەموو خەلكێ كوردستانێ دا. ئەوێن بەری سەرهلدانێ ژیاین، ل ئیراقێ و ئەوێن ئاوارەی دەرڤەژی بووین، ژیانا ئاوارەیێ و بندەستیێ دیتیە. بیرا من دهێت، گەلەك جاران كو ل گەل هەڤالێن خوە و پێشمەرگەیان د ڕوونشتین، د گوت، خوزی زڤریباین كوردستانێ و ب ئازادی ژیاباین، بلا ل بن تراشەكێ دا ژیاباین، هزار جاران سوپاس بۆ خودێ زڤرینە كوردستانێ، كوردستان نوكە یا ئازادە، نەكو د بن تراشان دا نینین، بەلكو كوردستان ژ هەموو ئیراقێ یا ئاڤەدانترە.
چەندین نفش پشتی سەرهلدانێ یێن ژ دایكبووین و مەزن بووین و چووینە زانكۆ و پەیمانگە و خواندنا خوە ژی ب دووماهی ئینایە. بەلێ ئەوا نوكە دیار، پشكەكا زۆر ژ وان گەنجان ئەو ئێش و ئازارە نە دیتینە، دبیت قەدر و قیمەتا ڤێ ئازادیا نوكە نەزانن، ئینشائەللا چو جاران وێ ژیانێ نەبینن، ئەوا مە دیتی. هەموو دەمەكی ب سەربلندی بژین و ئەوا ل سەر مە هەردوویان پێدڤی پێكڤە كاربكەین بۆ دەستەبەركرنا ژیانەكا باشتر بۆ وان.
ئەوێ شارەزایی د دیرۆكا خوە دا نەبیت، نەشێت پاشەڕۆژەكا باشتر بۆ خوە ئاڤا بكەت. پێدڤیە ل سەر مە هەموویان دیرۆكێ بینینە بیرا خوە و بزانین ژ كیڤە مە دەستپێكر و گەهشتینە كیڤە. گەلەك جاران كێشە و گرفت هەبوون، پێدڤیە بزانین ژێدەرێن وان كێشەیان چ بوون، بۆ ڕێگری ل مە هاتیە كرن و داخوازیێن مە وەكو پێدڤی نەهاتینە بجهئینان. ئەڤە كارێ مە ب تنێ نینە، كارێ هەڤپشكە، پێدڤیە هەر كەسەك د مالا خوە دا، ئەو بابێ پێشمەرگایەتی، نەخوەشی و بندەستی دیتی، بینیتە بیرا كچ و كۆرێن خوە كا چ ژیان دیتیە و نوكە د چ ژیانەكێ دانە و بۆ پاراستنا ڤێ ژیانێ پێدڤیە پێكڤە كار بكەین و پێدڤیە ڤێ ئەزموونێ بهێتە پاراستن. ل سەر حوكمەتا هەرێمێ ژی پێدڤیە دەلیڤەیان بۆ گەنجان پەیدا بكەت بۆ وێ چەندێ پاشەڕۆژەكا باشتر بۆ خوە ئاڤا بكەن.
