مەسرور بارزانی: سەقایەكێ ئەرێنی د دانوستاندنێن بەغدا و هەولێرێ دا هەیە
ئەڤرۆ
سەرۆكێ حوكمەتا هەرێما كوردستانێ، مەسرور بارزانی، د هەڤپەیڤینەكێ دا ل گەل پێگەهێ (مۆنیتۆر) یێ ئەمریكی باس ل چەند تەوەران كر ژ وان ڕەوشا ناڤخوەیا هەرێمێ، پەیوەندیێن د ناڤبەرا هەولێرێ و بەغدا، دۆسێیا تیرۆرێ و چەند پرسێن دی یێن گرنگ یێن گرێدای ئیراقێ و هەرێما كوردستانێ و دەڤەرێ.
مەسرور بارزانی، سەرۆكێ حوكمەتا هەرێما كوردستانێ د وێ هەڤپەیڤینێ دا گوت» پێدڤیە ناكۆكیێن سیاسی و ئابۆری د چارچۆڤەیێ جڤاتا وەزیران دا بهێنە چارەسەركرن، نەكو ب بایكۆتكرنا حوكمەتێ ژ ئالیێ وەزیرێن ئێكەتیێ ڤە».
گوت ژی» وەزیرێن ئێكەتیێ ل پەرلەمانی و ل بەردەم خەلكێ كوردستانێ سویند خواریە، بەلێ خوە ڤەدزین ژ بەرپرسیارەتیێ، چارەسەریا كێشەیان ناكەت».
ئاشكرا كر ژی» هۆكارێ ڕاستەقینەیێ ڤی بابەتی د ناڤبەرا پارتی و ئێكەتیێ دا، كوشتنا هاوكار عەبدوللا رەسول، ئەفسەرێ بەرێ یێ هەوالگریا ئێكەتیێ یە ل سالا بۆری ل هەولێرێ كو د ڤێ دۆسێیێ دا ئێكەتی یا هاریكار نەبوو، بۆ وێ چەندێ چاڤان ژ تیرۆركرنێ دوور بێخن، ئەو زێدەرەویێ د كێشەیێن دی دا دكەن، وەكو بابەتێ دارایی و دابەشكرنا دەستهەلاتێ، د دەمەكی دا ئەڤ كێشە بەردەوام هەبوون».
خویاكر ژی» ل شوینا هەموو كێشەیان تێكهەلی هەڤدوو بكەن، پێدڤیە سەرنجا وان ل سەر چارەسەركرنا كێشەیێن سیاسی و دارایی ب ڕێكا جڤاتا وەزیران بیت و بلا دادگەهـ و قانوون مامەلێ ل گەل دۆسێیا وێ پرسا كوشتنێ بكەن».
سەرۆكێ حوكمەتێ دیاركر» ب فەرمی من داخواز ژ ئێكەتیێ كریە، بۆ كۆمبوونێن جڤاتا وەزیران بزڤرن، لەوما هیڤیدارم بزڤرن بۆ حوكمەتێ و هەر كێشە و نێگەرانیەكا وان هەی، ب ڕێكا دانوستاندنێ د كۆمبۆنێن جڤاتا وەزیران دا چارەسەر بكەین، ژ بلی ڤێ چەندێ ژی هیچ ڕێكەكا دی نینە».
سەبارەت هەلبژارتنان، مەسرور بارزانی ڕاگەهاند» كێشەیێن د ناڤبەرا ئالیێن سیاسی دا هەر چ بن، پێدڤیە ڕێكەكا جودا بۆ ئێكلاكرنا كێشەیێن خوە ببینن، بەلێ نابیت هیچ تشتەك ل سەر كیستێ پاشئێخستنا هەلبژارتنان بیت و پێدڤیە ئەڤ سالە هەلبژارتن بهێنە ئەنجامدان».
سەبارەت پەیوەندیێن هەرێما كوردستانێ و ئەمریكا، مەسرور بارزانی گوت» ئەم دخوازن پەیوەندیێن مە باشتر ببن، پشكداریكرنا زێدەتر و وەبەرئێنانا زێدەتر. كورد و ئەمریكا بها و پرەنسیپێن هەڤپشك یێن هەین، ئەم هەڤپەیمانێن سروشتی نە و هیڤیا پشتەڤانیەكا زێدەتر دخوازین».
دیاركر ژی» پێدڤیە ئەمریكا زێدەتر پەرەپێدانێ ب پێشڤەچوونێن هەرێما كوردستانێ بدەت، پێدڤیە هەرێما كوردستانێ وەكو نموونەیەك بۆ وی ڕۆلێ ئەرێنی بهێتە بكارئینان كو ئەمریكا دشێت د دەڤەرێ دا بگێریت. بێی پشكداریكرنا راستەوخوە یا ئەمریكا د دەمێ 30 سالێن بۆری دا. مە ئەو هەموو تشتە نەدبوون كو ئەڤرۆ دهێنە دیتن، ئەڤە ژی چیرۆكەكا سەركەفتنا ئابۆری یە».
زێدەتر گوت» ئەمریكا كارەكێ مەزن كر ب ئازادكرنا ئیراقێ ژ ستەمكاریێ و دیكتاتۆریەتێ. بەلێ ب درێژیا سالان كاریگەریا پشكداریكرنا ئەمریكا كێم كر و ژ بەر نەبوونا وێ كارەكتەرێن دی ئەو ڤالاتیە پڕكر. ئەڤە ژی هاریكار نەبوو».
پتر گوت» ئەم دخوازین ئەمریكا، هەرێما كوردستانێ ب هەڤپەیمانەكا ب هێز و باوەرپێكری بزانیت و وەكو دۆستەك ب هەژمێریت كو مە هەمان بها و پرەنسیپ هەیە. ئەم بەردەوام باجەكا گران یا وێ هەڤالینیێ ددەین، مە پێدڤی ب پشتەڤانیەكا زێدەترە ژ ڕوویێ سیاسی و ئابۆری و ئەمنی ڤە».
مەسرور بارزانی باس ل وێ چەندێ ژی كر « ل هەرێما كوردستانێ دەلیڤەیەكا مەزن هەیە ل بەردەم ئەمریكا بۆ وەبەرئێنانا زێدەتر، ئەم د زەنگینین ب سامانێن سروشتی و ژێدەرێن مرۆڤی، شیانێن گەشەكرنێ هەم بۆ گەلێ كورد و هەرم بۆ كۆمپانیێن ئەمریكی مفا هەیە».
سەرۆكێ حوكمەتا هەرێمێ ئاماژە ب هەبوونا سەقایەكێ ئەرێنی كر د دانوستاندنێن ل گەل بەغدا كو بوویە ئەگەرێ د ڤێ هەفتیێ دا جڤاتا وەزیرێن ئیراقێ بودجەی پەسەند بكەت و ڤرێكەتە جڤاتا نوونەران كو بەهرا هەرێما كوردستانێ ژ بودجەیا گشتی یا ئیراقێ 12.6% هاتیە دیاركرن» .
هەروەسا گوت» پێشكەفتننەكا مەزن د دانوستاندنێن ل دۆر بودجەی بدەستڤەهاتینە، ئەو ب تمامی نینە یا مە دخواست، بەلێ ب دیتنا من بودجەیەكا كارایە».
خویاكر ژی» وەلات دێ مفای ژ پەسەندكرنا پڕۆژێ قانوونا بودجەی بینیت،پێشتر مە پشتەڤانیا خوە بۆ ڤێ بودجێ دیاركربوو، هیڤیدارم جڤاتا نوونەران بودجەی وەكو خوە دەرباز بكەت، ئەڤە ژی دێ بیتە دەستپێكەكا پەیوەندیەكا گەلەك باش. نەكو تنێ د ناڤبەرا بەغدا و حوكمەتا هەرێمێ دا ، بەلكو د ناڤبەرا بەغدا و پارێزگەهێن دی ژی دا، هەروەسا دێ بیتە ئەگەرێ ڤەژاندنا ئابۆری ژی».
مەسرور بارزانی ئاماژە كر ژی» سەقایێ ئەرێنی د دانوستاندنێن بودجەی دا دێ ئاسانكاریان پەیداكەت بەر ب قانوونەكا نیشتمانی بۆ پەترۆلێ كو ژ مێژە نەهاتیە بدەستڤەئینان، د بەرێ دا هندەك ڕەشنڤیس هەبوون، بەلێ چو جاران ژ ئالیێ جڤاتا نوونەران ڤە نەهاتنە پەسەندكرن» .
هەروەسا گوت» گەلەك جاران مە گوتیە ل گەل حوكمەتا فیدرالی كار دكەین بۆ بجهئینانا دەستووری وەكو خوە، پێدڤیە قانوونا پەترۆل و غازێ ل گەل مافێن هەرێما كوردستانێ د دەستووری دا بگونجیت، پاراستنا مافێن مە دێ ژ كارێن مە یێن سەرەكی بیت، ب دیتنا من ڕێكەك هەیە بۆ ڤەدیتنا چارەسەریەكێ كو كار پێ بهێتە كرن د ناڤبەرا بەغدا و هەولێرێ دا».
ژ ئالیەكێ دی ڤە سەرۆكێ حوكمەتێ ڕاگەهاند» ڕەوشا ئەمنی ل هەرێما كوردستانێ و ل سەرانسەری ئیراقێ ژ بەرێ باشترە و ئەڤە پێنگاڤەكا باشە، هاریكاری ژی یا گرنگە».
پتر گوت» پەیوەندیەكا گەلەك باشتر د ناڤبەرا هێزێن ئەمنی یێن كوردی و هێزێن ئیراقی دا هەیە، ژ وان ژی ئۆپەراسیۆنێن هەڤپشك دژی داعشێ كو بۆ باشتركرنا تەناهیێ هاتیە دروستكرن».
باس ل وێ چەندێ ژی كر» هەتا نوكە گەفا تیرۆرێ ل ئیراقێ و جهێن دی هەیە و دڤێت مامەلە ل گەل ڕیهوڕیشالێن تیرۆرێ بهێتە كرن و مخابن ب دیتنا من ئەو وەكو پێدڤی نەهاتینە چارەسەركرن».
سەرۆكێ حوكمەتێ دووپاتكر كو خەلكی پێدڤی ب خزمەتگوزاریێن حكومی یێن دروست و ژیانەكا هەژی هەیە، هەكە حوكمەت پێدڤیێن خەلكی دابین بكەت، گرنگیێ ب خەلكێ خوە بدەت، گوهداریا خەلكێ خوە بكەت و ل گەل خەلكی پەیوەندیان دروست بكەت، دێ حەزا هاریكاریكرنا خەلكێ ل گەل ڕێكخراوێن تیرۆرستی كێمتر كەت، هەروەسا دڤێت ب ناساندنا ئایدلۆژیەكا میانرەوتر كو هاندنا و هیڤیا پاشەڕۆژەكا گەش ب خەلكی بدەت، بەرهنگاریا ئایدلۆژیا تیرۆرستان ببیت، هەكە ئەڤە دێ بەردەوام بیت».
خویاكر» كابینەیا من دەست ب بەرنامەیەكێ چاكسازیێ یێ توند كریە كو مەبەستەكا مەزن هەیە، ژ وان ژی دروستكرنا شەفافیەتەكا زێدەتر د مەزاختیێن حوكمەتێ و دابینكرنا خزمەتگوزاریێن بازرگانی و بانكی دا».
