مەسرور بارزانی ل گەل بریكار و هاریكارێن وەزیرێ دەرڤە یێ ئەمریكا كۆمبوو
سەرۆكێ حوكمەتا هەرێما كوردستانێ د چارچۆڤەیێ سەرەدانا خوە دا بۆ واشنتۆن، ل گەل بریكار و هاریكارێن وەزیرێ دەرڤە یێ ئەمریكا كۆمبوو و رەوشا شنگالێ، دەستپێكرنا هنارتنا پەترۆلا هەرێما كوردستانێ و پێشئێخستنا كەرتێ وزێ ل هەرێما كوردستانێ گەنگەشەكر.
ل رۆژا دوشەمبی 26/2/2024، مەسرور بارزانی، سەرۆكێ حوكمەتا هەرێما كوردستانێ، ل واشنتۆن، د سێ كۆمبوونێن جودا دا، ل گەل هەر ئێك ژ باربارا لیف، هاریكارا وەزیرێ دەرڤە یێ ئەمریكا بۆ كاروبارێن رۆژهەلاتا نێزیك، عەزرا زییا، بریكارێ وەزارەتا دەرڤە یا ئەمریكا بۆ كاروبارێن ئاسایشا سڤیل و دیموكراسیێ و مافێن مرۆڤی و جیۆفری پیات، هاریكارێ وەزیرێ دەرڤە یێ ئەمریكا بۆ ژێدەرێن وزێ كۆمبوو.
د ئەوان كۆمبوونان دا پێشڤەبرنا پەیوەندیێن دو قۆلی و پاراستنا مافێن پێكهاتەیان و پێشڤەبرنا كەلتۆرێ پێكڤەژیانا ئاشتییانە و ئازادییا ئایینی و ئاساییكرنا رەوشا شنگالێ، هەروەسا دەستپێكرنا هنارتنا پەترۆلا هەرێما كوردستانێ و پێشئێخستنا كەرتێ وزێ ل هەرێما كوردستانێ هاتە گەنگەشەكرن.
