مەسرور بارزانی: نابیت سەرژمێرییا گشتی بۆ هیچ ئارمانجەكا سیاسی بهێتە بكارئینان
دوهی سێشەمبی 15/10/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل د. محەمەد ئەلحەسان، نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ كر.
ب گۆڕەی بەیاننامەیەكا حوكمەتا هەرێما كوردستانێ» سەرۆكێ حوكمەتا هەرێمێ سەرەرای پیرۆزباهییا دەستبكاربوونێ، پشتەڤانییا حوكمەتا هەرێما كوردستانێ ژ پێخەمەت سەرئێخستنا ئەركێ وی وەكو نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ دوباتكر» .
سەرۆكێ حوكمەتا هەرێمێ دوپاتی ل گرنگییا بەردەوامبوونا رۆلێ (یۆنامی) ژ پێخەمەت پاراستنا سەقامگیریێ و ئاشتیێ و ئاسایشا ئیراقێ و هەرێما كوردستانێ كر.
نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ ئاماژە ب وێ چەندێ كر» هەرێما كوردستانێ نموونەیەكا گەش و جوان یا پێشكەفتنێ و ئاڤەدانیێیە و دبیت ببیتە مودێلەك بۆ هەموو دەڤەرێن دی یێن ئیراقێ» . هەروەسا بەرهەڤییا نەتەوەیێن ئێكگرتی ژی بۆ هەر هەماهەنگییەكێ ل گەل حوكمەتا هەرێما كوردستانێ دیاركر.
وەكو د بەیاننامەیا حوكمەتا هەرێمێدا ئاماژە پێ هاتییە كرن» تەوەرەكێ كۆمبوونێ یێ تایبەت بوو ب بەرهەڤیێن هەلبژارتنێن پەرلەمانێ كوردستانێ، هەردو ئالی د هەڤڕا بوون ل سەر گرنگییا ئەنجامدانا هەلبژارتنان د رەوشەكا ئارام و دادپەروەرانە و دوور ژ پێشێلكاری و سەختەكاریێ».
د پشكەكا دی یا كۆمبوونێدا، بیر و بۆچوون ل دۆر ئەنجامدانا سەرژمێرییا گشتی یا ئاكنجیبوویان ل ئیراقێ كو بڕیارە ل 20/11/2024 بهێتە ئەنجامدان، هاتنە لێكگوهارتن.
سەرۆكێ حوكمەتا هەرێما كوردستانێ دوپاتكر» پشتەڤانیێ ل پڕۆسەیا سەرژمێرییا گشتی دكەین، بەلێ دڤێت تنێ ژ پێخەمەت پێشئێخستن و پێشڤەبرنا خزمەتگوزارییان و د بەرژەوەندییا هەموو هەڤوەلاتی و پێكهاتەیێن ئیراقێ بیت و بۆ هیچ مەبەست و ئارمانجەكا سیاسی نەهێتە بكارئینان».
