مەسرور بارزانی: پێدڤییە هەردەم قەوارەیێ فیدرالییێ هەرێما كوردستانێ بپارێزین
سەرۆكێ حوكمەتا هەرێما كوردستانێ ل سالڤەگەرا سەرهلدانا پیرۆز راگەهاند، پێدڤییە قەوارەیێ فیدرالیێ هەرێما كوردستانێ و بهایێن بلند یێن سەرهلدانێ و بنەمایێن پێكڤەژیانا ئاشتییانە و ئاشتیخوازی و مرۆڤدۆستییا گەلێ كوردستانێ هەردەم بپارێزین. دوهی سێشەمبی 5/3/2024، مەسرور بارزانی، سەرۆكێ حوكمەتا هەرێما كوردستانێ ل سالڤەگەرا 33 یا سەرهلدانا پیرۆز یا گەلێ كوردستانێ پەیامەك بەلاڤكر.
سەرۆكێ حوكمەتا هەرێما كوردستانێ د پەیاما خوە دا دبێژیت» ئەڤرۆ كو بیرئینانا سەرهلدانێ دكەین گەلەك یا گرنگ و پێدڤییە هەموو ئالی و پێكهاتە و هەر تاكەكێ كوردستانی، ب ئێكڕێزی و ئێكدەنگی، داكۆكییێ ل دەستكەفتێن نیشتمانی و مافێن دستووری یێن گەلێ كوردستانێ بكەن» .
مەسرور بارزانی خویاكر ژی» پێدڤییە قەوارەیێ فیدرالیێ هەرێما كوردستانێ و بهایێن بلند یێن سەرهلدانێ و بنەمایێن پێكڤەژیانا ئاشتییانە و ئاشتیخوازی و مرۆڤدۆستییا گەلێ كوردستانێ، هەردەم بهێنە پاراستن و گەشێ پێ بدەین، ب پشتڕاستی ژی ڤە سەروەرییا مە هەموویان یا گرێدایە ب هەبوونا كوردستانێ ڤە».
سەرۆكێ حوكمەتا هەرێما كوردستانێ، هەڤدەم باس ل ئەوێ چەندێ ژی كر» بلا سالڤەگەرا سەرهلدانێ زێدەتر مە هاندەت بۆ ئەوێ چەندێ پشتەڤانێن قەوارەیێ دستووریێ هەرێما كوردستانێ و حوكمەتا هەرێما كوردستانێ ببەین و هندی د شیاندا بیت ب باشترین شێوە، خزمەتەكا هەژیتر پێشكێشی هەموو خەلكێ كوردستانێ بكەت و پێكڤە، هەرێما كوردستانێ بەر ب قۆناغاەكا گەشتر ببەین».
