مەسروور بارزانی دبێژيت: فيدرالزم ل عيراقێ يا سه‌ركه‌فتى نه‌بوو
ئه‌ڤرۆ نيو، نيوار محه‌مه‌د سه‌ليم:
شيره‌تكارێ جڤاتا ئاسايشا هه‌رێما کوردستانێ مەسروور بارزانی د ھەڤپەیڤینەکی دا ل گەل ئاژانسا رويتەرز یا کو ئه‌ڤرۆ رۆژا پێنجشەمبى ھاتیە به‌لاڤكرن راگه‌هاند: ل عيراقێ بێ باوه‌رى گه‌هشتيه ئاسته‌كى ئێدى پێكهات نه‌شێن ل بن بانه‌كى پێكڤه بژين. ديسا گۆت: “فيدراليزم ل عيراقێ يا سه‌ركه‌فتى نه‌بوويه، پێدڤيه يان كونفيدرالى يان ژى جودابوونه‌كا ته‌مام بهێته په‌يره‌ۆ كرن.
شيره‌تكارێ جڤاتا ئاسايشا هه‌رێما كوردستانێ گۆت: “ده‌ما بوونه سێ ده‌وله‌تێن كونفيدرالى، سێ پايته‌خێن وه‌كهه‌ڤ دڤێن، ئه‌وى ده‌مى چ ژ وان د سه‌ر يێ دى را نابيت”.
ئاماژه ب وێ چه‌ندێ ژى كريه كو پێدڤيه هه‌مان بژارده ب پارێزگه‌هێن باكوور و رۆژئاڤايێ عيراقێ بهێته دان كو وه‌لاتيێن وان زێده‌تر سونه نه و گۆت: “ئه‌ڤا ئه‌م به‌رچاڤ دكه‌ين ب وێ رامانێ ناهێت، كو هه‌موو پێكهاته ل بن بانه‌كى دا پێكڤه بژين، به‌لێ دشێن هه‌ڤسۆيێن باش بن، ده‌ما هه‌ست بكه‌ن پاشه‌رۆژه‌كا گه‌ش و ئارام هه‌يه، دشێن هه‌ڤكاريا هه‌ڤدۆ بكه‌ن”.
مه‌سرۆر بارزانى گۆت: “سونو، هه‌ست دكه‌ن ژ لايێ سه‌ركردێن شيعه ڤه هاتينه پشتگوهـ خست، ئه‌ڤه ژى بوويه رێخۆشكه‌ر دا كو چه‌كدارێن ده‌وله‌تا ئيسلامى ده‌ست ب سه‌ر ده‌ڤه‌رێ دا بگرن”.
ده‌رباره‌ى شه‌رێ ئازادكرنا مووسل، شيره‌تكارێ جڤاتا ئاسايشا هه‌رێما كوردستانێ گۆت: “پێدڤيه پێكهاتێن مووسل پێشوه‌خت ل سه‌ر قووناغا پشتى شه‌رێ داعش رێ بكه‌ڤن كا دێ چاوان وى باژێرى ب رێڤه به‌ن، ب بۆچوونا من گرنگترين تشت ئه‌وه كو پشتى تێكشاندنا داعش چاوان مووسل بهێته ب رێڤه برن، مه نه‌ڤێت چ بۆشاى پشتى رزگاركرنا مووسل بهێنه ديتن دا كو ده‌ليڤه بۆ تێكده‌ران خۆش ببيت”.
