مەسیحی داخوازا پێکئینانا هەرێما دەشتا نەینەوا دکەن
ئەڤرۆ نیۆز،زنار تۆڤی:
کەنیسەیێن مۆسل و دەشتا نەینەوا راگەهاندنەکا هەڤبەش بەلاڤکریە و تێدا داخوازا دروستکرنا هەرێمەکا پاراستی بۆ مەسیحیێن عێراقێ کریە.
سەرۆکاتیا کەنیسەیێن مۆسل و دەشتا نەینەوا راگەهاندیه کو مەسیحی ئاکنجیێن بنچینەیی یێن عێراقێ نە و مە پشکداری کریە د دروستکرنا شارستانیەت و مێژوویا ڤی وەلاتی،بەلێ نوکە نزیکە کو ب تەمامی ژ عێراقێ بهێنە دەرخستن.
هەروەسا گۆتیە،پشتی چار هەیڤان ژ ئازادکرنا گەلەک ژ دەڤەرێن مە،هەتاکو نوکە ئەم نەشیاینە ڤەگەرینەڤە،لەورا ئەم وەک سەرۆکاتیا کەنیسەیێن مۆسل و دەشتا نەینەوا وەک بەرپرسیارەتیا دینی و مێژوویی و نیشتیمانی،ل هەمبەری دو هەلبژارتنا داینە،یان دڤێت ب زڤرینە دەڤەرێن خوە و ژیانەکا نوو دەست پێ بکەین،یان ژی دڤێت عێراقێ بجه بهێلین،کو نەشێت ئێمناهیێ بۆ مە دابین بکەت و ژیانا مە بپارێزیت.
هەروەسا داخوازێ ژ حوکمەتا عێراقێ و جڤاکێ نێڤدەولەتی دکەین،کو هەرێمەکا پاراستی ژ کێشە و ململانێ و ب چاڤدێریا نێڤدەولەتی ل دەشتا نەینەوا بۆ مە پێکبینن،ئەڤەژی مافێ مەیە و مە ژی شێوازەکێ خوە ب رێڤەبرنێ هەبیت ل وان دەڤەران.
ئەو ژی گۆتیە،ل دەڤەرێن دەشتا نەینەوا ل دووڤ سەر ژمێریا سالا 1957 کو باوەریترین سەرژمێریە،ئەم زۆرینەبووین،بەلێ ل دووڤدا دەڤەر بەر ب شەپۆلا گوهۆرینا ئەنقەست یا دیمۆگرافیێ ڤەچوو،هەروەسا هزرا دابەشکرنا پارێزگەها نەینەوا بۆ سێ پارێزگەهان پشتی هاتنا داعشێ هاتیە رۆژەڤێ و لایەنگرێن ڤی پرۆژەی دڤێت دەشتا نەینەوا بۆ سێ پارێزگەهێن(ناڤەندا مۆسل،دەشتا نەینەوا،شنگال) بهێتە دابەشکرن،ئەڤ پرۆژە ژلایێ پێکهاتەیێن عەرەبی ب سوننە و شیعەڤە ب توندی هاتیە رەدکرن،بەلێ ژلایێ پێکهاتەیێن دی وەک کورد و مەسیحی و شەبەک و ئێزدی یان ڤە پشتەڤانی لێ دهێتەکرن.
