مەكتەبا رێكخستنا پارتی ١٢٦ سالیا رۆژنامەڤانیا كوردی ل هەمی رۆژنامەڤانان پیرۆز دكەت
مەكتەبا رێكخستنا پارێزگەها دهۆكێ یا پارتی دیموكراتی كوردستان ب هەلكەفتا 126 سالیا رۆژنامەڤانیا كوردی پەیامەك بەلاڤكر و تێدا هاتیە: پیرۆزباهـیێن گەرم ل هەمی رۆژنامەڤانێن كوردستانێ ب گشتی و یێن سنوورێ دەڤەرا بەهـدینان ب تایبەت دكەین.
د پەیاما مەكتەبا رێكخستنا پارێزگەها دهۆكێ یا پارتی دا هاتیە: «دەركەفتنا ئێكەمین رۆژناما كوردی بناڤێ (كوردستان) ل قاهـیرە ل سەر دەستێ مالباتا بەدرخانیان پێنگاڤەكا گرنگا بزاڤا رەوشەنبیری و میدیایی و هەبوونا گەلێ كورد و ناڤێ پیرۆزێ كوردستانێ بوویە ل قاهیرە».
دیسا ئاشكرا ژی كریە كو رۆژنامەگەری و كارێ میدیایی ب دەستهـەلاتا چارێ دهێنە ناسین، لێ گەلەك جاران جهـێ دەستهـەلاتێن دی دگریت، لێ دڤێت هەردەم بهـایێن نیشتمانی بەرچاڤ بگرن و نەبنە ئەگەرێ تێكدانا شیرازا جڤاكی و پارتی دیموكراتی كوردستان باوەریەكا مۆكم ب كارێ میدیایی و رۆژنامەگەریا ئازاد هەیە.
د پەیاما مەكتەبا رێكخستنا پارتی دا هاتیە: «هیڤیدارین ئەڤ هەلكەفتا مەزن و گرنگ زێدەتر هاندەر بیت بۆ كارێ رۆژنامەگەری ل هەرێما كوردستانێ و پێشڤەبرنا ئەتەكێتێن رۆژنامەڤانیێ و زێدەتر كاركرن ل سەر رۆژنامەڤانیا نیشتمانی، بۆ هندێ رۆژنامەڤان ب دروستی ببیتە پرەك د ناڤبەرا خەلكی و دەستهـەلاتێ دا و هەمی بڕیار د خزمەتا بەرژەوەندیا گشتی دا بن».
مەكتەبا رێكخستنا پارتی ئاشكرا ژی كریە كو دڤێت رۆلێ مالباتا بەدرخانیان نەهـێتە ژبیركرن، كو د كاودانەكێ دژوار دا شیان ڤی رۆلێ مەزنێ نەتەوەیی و نیشتمانی بگێڕن و ڤی كارێ پیرۆز بناڤێ (كوردستانێ) ئەنجام بدەن.
دیسا هەر ب هەلكەفتا 126 سالیا رۆژنامەڤانیا كوردی دكتۆر عەلی تەتەر، پارێزگارێ دهۆكێ پەیامەكا پیرۆزباهیێ بەلاڤكر و تێدا هاتیە: «ب هەلكەفتا 126 سالیا رۆژنامەگەریا كوردی، جوانترین پیرۆزباهیان ئاراستەی هەمی رۆژنامەڤان و راگەهاندكارێن كوردستانێ دكەین، هیڤیدارین د كاروانێ كارێ خۆ یێ پشیەیی دا ب رێیەكا نشتیمانپەروەرانە و خزمەتكرنا گشتی دا د بەردەوامبن».
