“مە دخواست پێشمەرگەی رۆل د ئازادكرنا تکریتێ دا ھەبا”
ئەڤرۆ:
ل دۆر پرسا تالانکرنا مالان ل باژێرێ تکریتێ ژلایێ حەشد شەعبی ڤە، کەریم نوری پەیڤدارێ میلیشیێن حەشد شەعبی یێن شیعی بۆ ئەڤرۆ گوت” ئەڤ بابەتە یێ ھاتیە مەزنکرن بۆ ھندەک مەرەمان و ئارمانج ژێ کرێتکرنا وێنێ حەشد شەعبی یە و ل ھەموو ولاتێن جیھانێ روودانێن ب ڤی شێوەی رووددەن، ل عیراقێ ژی ل دەڤەرێن جەلەولا و سەعدیە دیاردا تالانکرنێ روودابوو و ئەڤە پرسەکە ژ دەرڤەی قانوونێ و رەوشتی یە و پێدڤیە ئەو کەسێن ب ڤان کاران رادبن بھێنە سزادان و ئەڤ چەندە دۆر ژ فەرمانێن حوکمەتێ و لەشکری و حەشد شەعبی دھێتە کرن و ئەو کەسێن ب ڤان کریاران رادبن دخوازن ناڤێ مە کرێت بکەت ل بەردەم رایا گشتی یا عیراقی. مە شەرەکێ مەزن ل گەل تیرۆرستێن داعشێ کر ب ھەڤکاری ل گەل لەشکرێ عیراقێ و باژێرێ تکریتێ ب تمامی ژ داعشێ ھاتە رزگارکرن، گەلەک کارێن ھاتینە کرن ژی بۆ نموونە ژناڤبرنا خانیان، گەلەک ژ خانیان ھاتبوونە بومبەکرن ژلایێ تیرۆرستێن داعشێ ڤە و ھندەک ژ خانیان ژی تیرۆرستان خوە تێدا ئاسێکر بوو، لەوما ئەو خانیێن ب وی شێوەی ھاتنە پەقاندن و ژناڤبرن ژلایێ ھێزێن لەشکرێ عیراقێ و حەشد شەعبی ڤە. ئەم رەت ناکەین کو ھندەک ژ چەکدارێن حەشد شەعبی ب کارێ تالانکرنێ یێن رابووین و مە چەندین پێرابوون وەرگرتبون و خالێن پشکنینێ ژی بۆ نەھێلانا وێ دیاردەی مە دناڤ باژێرێ تکریتێ دا دانابوون و ھەر کەسێ دەست د تالانکرنێ دا ھەبیت دێ ھێتە سزادان.
گوت ژی” ھێزێن سەر ب حەشد شەعبی ڤە دێ ژناڤ باژێرێ تکریتێ ھێنە ڤەکێشان و ھێزێن پۆلیسان دێ ل باژێرێ ھێنە بەلاڤکرن”. ل دۆر ھەبوونا رۆلێ پێشمەرگەی د رزگارکرنا تکریتێ دا و جۆرێ ھەڤکاریێ دناڤبەرا حەشد شەعبی و پێشمەرگەی دا ل پاشەرۆژێ.
کەریم نوری گوت”مە دخواست پێشمەرگەی رۆل د رزگارکرنا تکریتێ دا ھەبایە، کا چاوان پێشمەرگەی رۆل د رزگارکرنا جەلەولا و سەعدیە و ئامرلی و سلێمان بیگ دا ھەبوو، بێگۆمان دێ پێشمەرگەی رۆل د رزگارکرنا حەویجە دا ھەبیت، ئەم و پێشمەرگە یێن د ئێک چەبەر دا و مە دوژمنەکێ ھەڤپشک و چارەنڤیسەکێ ھەڤپشک یێ ھەی و ئەم دخوازین ھەڤپشکیا مە ب ھێزتر لێ بھێت ژ بۆ دەرکرنا داعشێ”.
ل دۆر ئارمانجێن بھێت یێن لەشکرێ عیراقێ و حەشد شەعبی، ئایا دێ بەر ب کیش باژێرێ د دەستێ داعشێ دا چن، پەیڤدارێ حەشد شەعبی گوت” ھەموو پێشھات بۆ ڤێ چەندێ د ڤەکرینە و نەشێم پلانێ ئاشکرا بکەم، دبیت ھێرشا بھێت ل سەر شرگاتێ بیت، یان ژی بێجی و رومادی و حەویجە بیت”.
