نابیت راگەھاندن بچیتە سەنگەرێن شەری
ئەڤرۆ، حەمۆ محەمەد:
وەزارەتا پێشمەرگەی یا حوکمەتا ھەرێما کوردستانێ دیار کر کو پێخەمەت ئاشکرا نەبوونا پێزانینێن سەربازی و پاراستنا وان بڕیار دایە چوونا سەنگەرێن پێشیێ یێن شەری ل دەزگەھێن راگەھاندنێ بھێتە قەدەغەکرن و رێڤەبەرێ رەوشەنبیری و راگەھاندنا وەزارەتا پێشمەرگەی ژی دبێژیت: “ڤێ بڕیارێ پەیوەندی ب قانوونا سەربازی ڤە ھەیە و ب چ رەنگان نابیت زانیاری بھێنە ئاشکراکرن”.
ھەلگورد حکمەت، رێڤەبەرێ رەوشەنبیری و راگەھاندنێ ل وەزارەتا پێشمەرگەی یێ حوکمەتا ھەرێما کوردستانێ بۆ ئەڤرۆ راگەھاند، وان قانوونا سەربازی ھەیە کو پەیوەندی ب مەسەلا ئاشکرا نەکرنا پێزانینان ڤە ھەیە و گۆت “ئەم وەکو جڤاتا بەرگری یا وەزارەتێ د دەمێ بۆری دا کۆمبووین و مە رێنمایەک بۆ ھەموو یەکەیان، دام و دەزگەھان و ھێزێن پێشمەرگەی ھنارتیە کو پێزانین و داخویانی دەربارەی ھێرشان و سەنگەرێن شەری و چەک و تەقەمەنیان ژی ب ھەموو رەنگان ھاتیە قەدەغەکرن”.
ناڤھاتی گۆت ژی “ب چ رەنگان نابیت دەزگەھێن راگەھاندنێ بچنە سەنگەرێن پێشیێ و وێنان بگرن و ڤیدیۆ کەن و بەلاڤ کەن، چونکو ئەڤە دێ بیتە جۆرەک ژ ئاشکراکرنا زانیاریان بۆ دوژمنی و دیسا گەلەک جاران ھندەک دیمەن دھێنە بەلاڤکرن کو ب نەرێنی بۆ پێشمەرگە دزڤرن”.
رێڤەبەرێ رەوشەنبیری و راگەھاندنا وەزارەتا پێشمەرگەی ئاشکرا کر، رۆژنامەڤانێن سەربازی کێم ھەنە و گەلەک جاران بەرەلایی دکەفتە بەلاڤکرنا دەنگوباسێن شەری دا و گۆت “دڤێت رۆژنامەڤان د ئاستەکێ بلندێ ھشیاریا نەتەوەیی دا بن و وان دەنگوباسێن سەربازی ئەوێن بەلاڤ دکەن زانیاریان نەدەنە دوژمنی، دا کو مەترسی ل سەر ھێزێن پێشمەرگەی دروست نەبیت”.
ھەلگورد حکمەت ئاماژە دا وێ چەندێ ژی کو ل دووڤ بڕیارا ھژمار ئێک یا سالا ٢٠٠٧ یا سەرۆکاتیا ھەرێما کوردستانێ ب تنێ ئێک پەیڤدارێ فەرمی یێ وەزارەتێ ھەیە، ئەو ژی ئەمین کو دڤێت داخویانیا بدەین، کۆنگرێن رۆژنامەڤانی گرێدەین و راگەھاندنان بەلاڤ بکەین.