نابیت قوتابی بھێنە نەچارکرن ژ کۆمپانیەکا دەستنیشانکری جلکێن وەکھەڤ بکرن
ئه‌ڤرۆ نيوز:
رێڤەبەرێ گشتیێ پەروەردێ ل پارێزگەھا دھۆکێ بۆ ئەڤرۆ دیار کر کو نابیت ئەڤ سالە کارگێریێن قوتابخانان قوتابیێن خوە نەچاربکەن ژ کۆمپانیەکا دەستنیشانکری جلکێن وەکھەڤ بۆ خوە بکرن، بەلکو قوتابی یێ ئازادە ل کیرێ بۆ خوە بکریت.
عەبد یوسف، رێڤەبەرێ گشتیێ پەروەردێ ل پارێزگەھا دھۆکێ ئاشکرا کر، ل دووڤ ڕاسپاردێن وەزیری پەروەردی، ئێکرەنگیا جلکێن قوتابیان دێ ھەبیت و بۆ ئەڤ سالا خواندنێ جلکێن وەکھەڤ یێن قوتابیان ھەر دێ وەکو یێن سالا بۆری بن و گۆت: “ب چو رەنگا نابیت کۆمپانیەک بھێتە دەستنیشانکرن و قوتابی بھێتە نەچارکرن ل وێ کۆمپانیێ جلکێن وەکھەڤ بکریت”.
خویا ژی کر، پشتی وان ڕاسپاردێن وەزیری گەھاندینە ھەموو قوتابخانان، دیاربوو ھندەکان ل وەرزی ھاڤینێ بەرھەڤی کربوون و گرێبەست د گەل ھندەک کۆمپانیان ئیمزاکربوون کو جلکێن وەکھەڤ بۆ قوتابیان ب بھایەکێ ئەرزان دابین بکەن، دیسا کۆمپانیان بەرھەڤیا خوە دیارکربوو بێ بەرامبەر بۆ زارۆیێن شەھیدان و پێشمەرگەھێن قەرەمان دروست بکەن و گۆت: “رێڤەبەریێن وان قوتابخانان ب ئاگەھداریا سەمیانێن قوتابیان ئەڤ چەندە یا کری، لێ ل گۆرەی بڕیارا پەروەردی یا نوو کو بەری چەند رۆژان یا دەرکەفتی، قوتابی یێ ئازادە بۆ خوە جلکێن وەکھەڤ ل کیرێ بکریت”.
گۆتژی: “رێڤەبەریێن وان قوتابخانان وەسا تێگەھشتینە کو ئەڤ سالە ژی دەستھەلات یا وانە، چونکو سالا بۆری دەستھەلات ب رێڤەبەریێن قوتابخانەان ھاتبوو دان جلکێن وەکھەڤ ل کۆمپانیان بۆ قوتابیان دروست بکەن، لێ ئەڤ سالە ئەو بڕیار یا ھاتیە ھەلوەشاندن”.
