ناتۆ و ئێکەتیا ئورۆپا دێ مامەلەکا نوو دگەل پیشمەرگەی کەن
ئەڤرۆ نیوز،زنار تۆڤی:
نوونەرێ حوکمەتا ھەرێما کوردستانێ ل ئێکەتیا ئورۆپا دلاوەر ئاژگەیی بۆ ئەڤرۆ نیوز دیارکر:شاندەکێ بلند یێ پێشمەرگێ کوردستانێ ب سەردانەکا فەرمی گەھشتنە بروکسل و زنجیرەیەکا دیداران دگەل ھەر ئێک ژ ئۆفیسا سیاسەتەتا دەرڤە و و ئەنجۆمەنێ ئاسایش و بەرگریا ئێکەتیا ئورۆپی و پەرلەمانێ ئورۆپا و و پەرلەمان و ئەنجۆمەنێ پیرێن بەلجیکا و نوونەراتیا ھنگاریا د رێکخراوا ناتۆ دا ئەنجام دا، سەرەدانا وی شاندێ پێشمەرگەی ژ چەند بەرپرس و ئەفسەرێن بلند و مەیدانی پێکھاتبوون،ب ئارمانجا بەحسکرنا رەوشا جەنگی و دژی داعشێ و پێشکێشکرنا داخوازی و پێدڤیێن ھێزێن پێشمەرگێ کوردستانێ بوو.
ناڤھاتی گۆت ژی:شاندێ پێشمەرگەی داخوازکر کو ھاریکاریێن راستەوخۆ رەوانەی ھەرێمێ بکەن،چونکی بەغدا ناھێلیت ھاریکاریێن سەربازی بگەھنە پێشمەرگەی،ئەڤ سەرەدانا پێشمەرگەی پشتی پرۆژە بریارەکا گرنگ یا ئەنجۆمەنێ ناتۆ دھێت،کو تێدا داخوازی ژ وەلاتێن ئەندامێن رێکخراوا ناتۆ کریە کو مامەلەیا راستەوخۆ دگەل پێشمەرگەی بکەن،ھەر ژ پر چەککرنێ تا راوێژ و مەشق و راھێنانان.
دلاوەری دیارکر ژی:چاڤدێرێن سەربازی وەسا ددەنە دیارکرن کو پشتی دەستێوەردانێن رووسیا ل سووریێ و عیچراقێ وەلاتێن ئورۆپا پتر گرنگیێ ب پێشمەرگێ کوردستانێ ددەن وەک ھێزەکا باوەر پێکری ھەڤپەیمان مامەلێ دگەل دکەن،ئەڤەژی دەرفەتەکا باشە بۆ بھێزکرنا پەیوەندیێن سەربازی یێن دناڤبەرا ھەرێما کوردستانێ و وەلاتێن ناتۆ و ئێکەتیا ئورۆپا.
