ناحیا باعەدرێ پێدڤی ب ڤەکرنا پشکەکا ھاتنوچوونێ یە
ئه‌ڤرۆ نيوز:
رێڤەبەرێ ناحیا باعەدرێ بۆ رۆژناما ئەڤرۆ دیار کر کو دەڤەرا باعەدرێ دەڤەرەکا گرنگە ژلایێ ھاتنوچوونێ ڤە و ھەر د خزمەتا گشتی دایە کو رێیا سەرەکیە بۆ ھەموو پارێزگەھێن ھەرێمێ و سالانە چەندین روودانێن نەچاڤەرێکری دروست دبن، لەورا ئەڤ دەڤەرە پێدڤی ھەبوونا پشکەکا ھاتنوچوونێ یە.
مافپەروەر شەمال محەمەد ئەدیب رێڤەبەرێ ناحیا باعەدرێ دیار کر کو چەندین جاران پەیوەندی ب رێڤەبەریا ھاتنوچوونا دھۆکێ کریە و گۆت “ئەگەر ژبەر ئاڤاھی بیت ئاڤاھی ژی مە ھەیە، ھەرچەندە ئەم د رەوشەکا خراب داینە ژ بەر بڕینا بودجا ھەرێمێ بەس گەلەک یا پێدڤیە بھێتە ڤەکرن، چونکی ل سەر رێیا سەرەکیا دھۆک بۆ ھەولێر رۆژ نابۆریت بێ روودان، ئەڤجا ئەو بارگرانی ژی بۆ بنگەھێ ھاتنوچوونا شێخان دمینیت”.
رێڤەبەرێ ناحیا باعەدرێ خویا ژی کر کو ھەر وەختەکێ بریارا ڤەکرنا وێ بھێت وان جھەکێ تایبەت بۆ ھاتیە بەرھەڤ کریە و گۆت “داخواز ژ لایەنێن شولەژێ دکەین کو ئەڤ فەرمانگەھە بھێنە ڤەکرن، چونکی پتر دێ خزمەتا دەڤەرا باعەدرێ و دەوروبەر کەت”.