ناڤێن 14 هزاران ژ لیستا مووچێ كێم ئه‌ندامیێ هاتینه ده‌رخستن
ئه‌ڤرۆ:
وه‌زیرا كار و كاروبارێن جڤاكی ل حوكمه‌تا هه‌رێما كوردستانێ دیار كر، یاسایا چاكسازیێ ب باشی دهێته بجهئینان و د وی چارچوڤه‌ی دا ناڤێن 14 هزار كه‌سان ژ لیستێن مووچه‌یێ كێم ئه‌ندامان هاتینه ده‌رئێخستن و رۆتین ژی نه‌مایه.
كوێستان محه‌مه‌د، وه‌زیرا كار و كاروبارێن جڤاكی ل حوكمه‌تا هه‌رێما كوردستانێ د كۆنگره‌كێ رۆژنامه‌ڤانی دا خویا كر، ل گۆره‌ی بڕیارا جڤاتا وه‌زیران پێدڤیه هه‌موو رێڤه‌به‌ری سیسته‌مێ ئێك په‌نجه‌ره پر بكه‌ن بۆ نه‌هێلانا رۆتینیێ و هاریكاریكرنا وه‌لاتیان و گۆت: “مه وه‌كو وه‌زاره‌تا كار و كاروبارێن جڤاكی ده‌ست ب ڤی سیسته‌مێ ئێك په‌نجه‌ره كریه”.
كوێستانێ ئاشكرا ژی كر، د چارچوڤێ یاسا چاكسازیێ دا، ئه‌و شیاینه پێداچوونێ د لیستێن كێم ئه‌ندامان دا بكه‌ن و ناڤێن 14 هزار كێم ئه‌ندامێن پێشتر ژ هه‌ژی نه‌بوون یان وه‌غه‌ركرینه یان چووینه ژ ده‌رڤه‌ی وه‌لاتی ژ لیستێن مووچه‌یان هاتینه ده‌رئێخستن.
وه‌زیرا كار و كاروباێن جڤاكی د وی كۆنگرێ رۆژنامه‌ڤانی دا گۆت: “ل هه‌موو وه‌زاره‌تان یاسایا چاكسازیێ د ده‌رماله و خانه‌نشینا فه‌رمانبه‌ران دا چوویه د وارێ بجهئینانێ دا، ل گشت وه‌زاره‌تان ژی دوسیێن وان به‌ره‌ڤ ته‌مامبوونێ ڤه دچن و ب رێژه‌كا باش چاكسازی به‌ره‌ڤ پێشڤه چوویه”.