ناڤێ شنگالێ ب فەرمی بۆ کوردی ھاتە گوھۆرین
ئەڤرۆ نیوز:
قایمقامێ قەزا شنگالێ دیار کر کو پێشنیارا وان بۆ گوھۆرینا ناڤێ شنگالێ یێ عەرەبی ئانکو (سنجار) بۆ کوردی ژ لایێ ھەردو جڤاتێن قەزا شنگالێ و جڤاتا پارێزگەھا نەینەوا ڤە ھاتە پەسەندکرن و گۆت: “ژ نوکە و وێڤە ناڤێ وێ ب رەنگەکێ فەرمی دێ بیتە شنگال کو ب کوردیە”.
مەحما خەلیل، قایمقامێ قەزا شنگالێ ئاشکرا ژی کر، د دەمێ بۆری دا وان پێشنیار کربوو، کو ناڤێ شنگالێ ژ عەرەبی بھێتە گوھۆرین بۆ کوردی و بۆ مالپەرێ فەرمیێ پارتی دیموکراتی کوردستان گۆت: “ژ لایێ ھەردو جڤاتێن قەزا شنگالێ و جڤاتا پارێزگەھا نەینەوا ڤە ئەو پێشنیارا مە کەفتە بەر دەنگدانێ و ھاتە پەسەندکرن، لەو ژ نوکە وێڤە ب رەنگەکێ فەرمی دێ سەرەدەری ل گەل ناڤێ کوردی یێ شنگالێ ھێتە کرن، نە وەکو بەری نوکە ناڤێ وێ یێ عەرەبی”.
قایمقامێ قەزا شنگالێ ئاماژە ب وێ چەندێ ژی کر، پشتی گوھۆرینا ناڤێ شنگالێ بۆ کوردی، بزاڤا وان دێ ئەو بیت، قەزا شنگالێ ببیتە پارێزگەە و ڤەگەریتە سەر ھەرێما کوردستانێ ڤە.
قەزا شنگالێ کو ژ لایێ کارگێری ڤە نوکە سەر ب پارێزگەھا نەینەوا ڤەیە و رێژەکا زۆر یا کوردێن ئێزدی لێ ئاکنجینە، ئەو قەزایە ل ھەیڤا تەباخا 2014 ژ لایێ تیرۆرستێن داعشێ ڤە ھاتبوو کۆنترولکرن و کارەساتەکا مەزن ب سەرێ کوردێن ئێزدی ئینابوو، ھژمارەکا زۆر یا کچ و ژن و زارۆیێن ئێزدی ژی رەڤاندبوون.