ناڤەندا خانی یا رەوشەنبیری و راگەهاندنێ ل دهۆكێ ئەنجامێن دو بەریكانەیان راگەهاندن
شاكر ئەتروشی:
ب هەلكەفتا (80) سالیا دامەزراندنا پارتی دیموكراتی كوردستان و رۆژا ژدایكبوونا سەرۆك و مەرجەعێ كوردان (مەسعود بارزانی) ناڤەندا خانی یا رەوشەنبیری و راگەهاندنێ ل دهۆكێ، دوهی ئێڤاری درێ و رسمەكێ تایبەتدا ئەنجامێن دو بەریكانەیان ل هولا ناڤەندنێ ل ئاڤاهیێ تەلەفزیۆنا دهۆك راگەهاندن و سەركەفتێن هەردو بەریكانەیان هاتنە خەلاتكرن، كو (8) ژوان كارمەندێن رۆژنامەیا ئەڤرۆ بوون.
پشتی راوەستیان دەقیقەكێ وەك رێزگرتن ل سەر گیانێ شەهیدان و سەروەرێ وان بارزانیێ نەمر و ئدریسێ هەردەمێ ساخ ل گەل سرودا نشتیمانیا ئەی ڕەقیب، هەلبەستەكا پێشمەرگە و كادرێ دێرین حەبیب كەلەش كو ب بارزانیێ نەمر هاتبوو نڤیسین و ژلایێ هونەرمەند حەسەن شەریف ڤە بوویە ستران، ژلایێ مەدیاكار مسلح یاسین نێروەیی ڤە هاتە خواندن، د دووڤدا بەرێز ئیحسان ئامێدی بەرپرسێ ناڤەندا خانی یا رەوشەنبیری و راگەهاندنێ ل دهۆكێ، پەیڤەك خواند و تێدا بەحسێ گرنگیا دامەزراندنا پارتی دیموكراتی كوردستان ل سالا 1946 ل سەر دەستێ بارزانیێ نەمر و ب كورتی بەحسێ وان قوناغان كر ئەوێن پارتی تێدا دەربازبووی هەر ژ دەستپێكا دامەزراندنا وێ هەتا شۆڕەشا مەزنا ئیلۆنێ و شۆڕەشا گولاتێ، هەتا سەرهلدانا پیرۆزا سالا 1991 و هەلبژارتنا پەرلەمانێ كوردستانێ و كابینەیا ئێكێ یا حكومەتا هەرێما كوردستانێ و دەستكەفتێن دووف ئێك هەتا ئەنجامدانا ریفراندۆمێ ل رۆژا 25 ئیلۆنا سالا 2017 و شكاندنا هەیبەتا داعشێ و هەتا ئەڤرۆ، ژبەر هندێ دێ بێژیم پارتی بوون شانازیە و دێ ل سەر ڤێ رێبازا پیرۆز دبەردەوام بین هەتا هیڤیا مە هەموویان بجه دهێت، ئەو ژی راگەهاندنا دەولەتا كوردستانێ یە.
د دووڤدا (ئیسماعیل بادی) بەرپرسێ پشكا ڕەوشەنبیری ل ناڤەندێ پەیڤەك خواند و تێدا گۆت: بەردەوامی دان ب چالاكیێن پشكا ڕەوشەنبیری مە دو بەریكانە راگەهاندبوون، یا ئێكێ بۆ كارمەندێن ناڤەندێ كو نێزیكی (70) كارمەندان تێدا د پشكداربوون و یێن سەركەفتی هاتنە خەلاتكرن، بەریكانەیا دویێ ژی ڤەكولین بوون بۆ ئەوێن ژدەرڤەی ناڤەندنێ و (23) ڤەكۆلین هات بوون، ئەو ژی سێ هاتنە خەلاتكرن كو ئەو ژی (مەسعود خالد گولی، دژوار پیرامیس، سەفەر ئەیوب) بوون و (10) ڤەكۆلینێن دی دێ د پەرتووكەكێ دا هێنە چاپكرن و ئەڤە بەریكانەیا شەشێ بوو د ئەڤ سالەدا مە ئەنجامدای و دێ د بەردەوام بین.
