نهجمهدین غولامی نووترین بهرههمێ خوە بهلاڤكر
زنار تۆڤی:
نهجمهدین غولامی، هونهرمهندێ ناسیارێ كورد، نووترین بهرههمێ خوە ب ناڤێ «تهمهن»، ب شێوێ ڤیدیۆ كلیپ، كو بهرههمێ هونهری یێ ناڤهندا زهنییه بهلاڤكر و دبێژیت: من بزاڤكرینه پهیڤ و ئاواز و ڤیدیۆ كلیپا ڤێ سترانێ ب رهنگهكێ بیت كو ههر گۆهدار و بینهرهك بشێت خوە د ناڤ ڤێ چیرۆكێ دا ببینیت و ههست بكهت ئهڤ بهرههمه بهحسێ ژیانا وی دكهت.
ناڤهاتی گۆت ژی: سترانا تهمهن، ل سهر هۆزانهكا جوان یا مازیار فایهق هاتیه چێكرن، من ژی ئاواز بۆ دانایه، ههروهسا ئامادهكرن و دابهشكرنا مۆزیكێ ژلایێ زامیار نامۆڤه هاتیه ئهنجامدان و من بزاڤكریه بهرههمهكی پێشكێش بكهم، پهیامهك و ههستهكێ كوور یێ مرۆڤی بگههینم، ههروهسا ناڤهرۆكا ڤێ سترانێ ل سهر وێ راستیێ هاتیه ئاڤاكرن كو ههموو مرۆڤ، بێی جوداهی، ل قووناغێن ژیێ خۆ دا دهرباز دبن و دگههنه قووناغا پیریێ، لهوما من بزاڤكریه كو پهیڤ و ئاواز و ڤیدیۆ كلیپ ب رهنگهكێ بیت كو ههر گۆهدار و بینهرهك بشێت خۆ دناڤ وێ چیرۆكێدا ب بینیت و ههست بكهت ئهڤ بهرههمه بهحسێ ژیانا وی دكهت.
نهجمهدین غولامی ئاشكراكر ژی: ڤێ سترانێ پهیامهكا رۆن ههیه، ئهو ژی ئهوه نابیت وهكو دووماهیهك بهرێ خوە بدهینه پیراتیێ، بهلكو قووناغهكه یا پره ژ ئهزموون، بیرهوهری و سهرهاتیان، ههر ژییهكێ ژی جوانیا خۆ و تایبهتمهندیا خۆ ههیه، دانعهمری ژی ب ههموو وان ئهزموونێن كو دگهل خۆ ههلدگریت، جوانیهكا جودا ههیه و جهێ رێز و گرنگیدانێ نه، ههروهسا جوداهیا ڤێ سترانێ دگهل بهرههمێن من یێن پێشتر، ب تنێ د شێواز ئاوازدانانێ و موزیكێدا ههیه، رهنگ و ههستێ موزیكێ ب شێوهكێ هاتیه ههلبژارتن كو دگهل پهیاما سترانێ ئێك بگریت و پتر كاریگهریێ ل سهر گۆهداری چێدكهت، راسته پێشتر هونهرمهندێن دیتر ستران ل سهر ژیێ مرۆڤی گۆتینه، بهلێ پهیاما من ئهوه ئهڤ بهرههمه، ژ روویێ ههلبهستێ و ئاواز و موزیكێ ڤه، ناسنامه و تامهكا تایبهتا خۆ ههیه.
نهجمهدین غولامی، ل سالا 1958 ل تاخێ گۆلشهن ل باژێرێ سنه ل رۆژههلاتێ كوردستانێ ژ دایكبوویه، د ژیێ 18 سالیێ دا ب رێیا رادیۆیا سنه و كرماشان دهست ب سترانگوتنێ كریه، ههر ژ زارۆكینیا خۆ حهزا سترانگۆتنێ ههبوو و ل ژێر كاریگهریا سترانێن بابێ خۆ و مامێ خۆ كو ههردو دهنگخۆشێن سهردهمێ خۆ بوون، دهست ب گۆتنا سترانان كریه، دیسا ب هاریكاریا هونهرمهندێ مهزن و وهغهركری یێ كورد «عهباسی كهمهندی، ل كۆچكا گهنجێن سنه بهرههمێ خۆ یێ ئێكێ تۆماركر و ههتا نوكه 23 ئهلبۆم بهلاڤكرینه.
