نوشدارێن ئه‌مریكى دێ هژماره‌كا نشته‌گه‌ریان بۆ وه‌لاتیێن دهۆكێ ئه‌نجام ده‌ن
دهۆك، له‌زگین جۆقى:
ئه‌ڤرۆ سپێدى 21/5/2017 شانده‌كێ نوشدارێن ئه‌مریكى گه‌هشتنه پارێزگه‌ها دهۆكێ و دێ ده‌ست ب ئه‌نجامدانا هژماره‌كا نشته‌گه‌ریان كه‌ن هه‌روه‌سا ژى دێ خولێن مه‌شق و راهێنانێ بۆ نوشداران ڤه‌كه‌ن.
د. نزار عصمه‌ت ته‌یب رێڤه‌به‌رێ گشتى یى ساخله‌میا پارێزگه‌ها دهۆكێ دیاركركو ئه‌ڤه نه جارا ئێكێ یه نوشدارێن ئه‌مریكى هه‌ڤكاریا ساخله‌میا دهۆكێ دكه‌ن به‌رى نوكه ژى چه‌ندین جاران د. غازى زێبارى دگه‌ل نوشدارێن ئه‌مریكى سه‌ره‌دانا دهۆك كریه و نشته‌گه‌رى بۆ وه‌لاتیان ئه‌نجام داینه ب تایبه‌تى ژى نشته‌گه‌ریێن ب زه‌حمه‌ت بۆ نه‌خۆشان دهێنه كرن ل نه‌خۆشخانێن دهۆكێ ژلایێ ستافێ نوشدارێن ئه‌مریكى ڤه.
د. غازى زێبارى، سه‌رۆكێ شاندێ نوشدارێن ئه‌مریكى، دیاركركو شانده‌كێ نوشدارێن ئه‌مریكى پێكهاتى ژ 30 نوشدارێن تایبه‌تمه‌ند دبوارێن ژێك جۆدا دێ بێ به‌رامبه‌ر هه‌ژماره‌كا نشته‌گه‌ریێن په‌نچه‌شیرى و كوما ده‌ماران وچه‌ندین نشته‌گه‌ریێن دى یێن ب زه‌حمه‌ت دێ بو وه‌لاتیان ئه‌نجام ده‌ن.
سه‌رۆكێ شاندى نوشدارێن ئه‌مریكى، دیاركركر ژى كو نوشدارێن ئه‌مریكى ئه‌ڤرۆ 21/5/2017 دێ ده‌ست ب نشته‌گه‌ریان كه‌ن بۆ ماوێ حه‌فت رۆژان دێ ل نه‌خۆشخانا ئازادى یا فیرَكرنى ل دهۆكێ و نه‌خۆشخانا ته‌نگاڤیان نشته‌گه‌ریان بێ به‌رامبه‌ر وه‌كو ئه‌ركه‌كێ مرۆڤایه‌تیى و نشتیمانیى دێ بۆ خه‌لكێ ئه‌نجام ده‌ن و دێ چه‌ندین خۆلێن مه‌شق و راهێنانى ژێ بۆ نوشدارێن دهۆكێ هێنه ڤه‌كرن ل سه‌ر ئه‌نجامدانا نشته‌گه‌ریێن قورس ومفا وه‌رگرتنێ ژ پێشڤه‌چوونا زانستى نوشدارى”.
