نوشدارێن دھۆکێ د بەلگە فلمەکێ فیستڤالا دھۆکێ دانە
ئەڤرۆ، سالار دۆسکی:
فلمێ دوکومێنتاری (مرن بۆ ژیانێ) کو ژ دەرھێنانا (محەمەد ژووری) یە ماوێ وی (54) خولەکن، دەرھێنەرێ فلمی ئاشکرادکەت کو ب رێکا کومپانیەکێ ل وەلاتێ ئەلمانیا ل چەندین فیستەڤالێن جیھانێ دھێتە بەلاڤەکرن، بۆ جارا ئێکێ ل فلمە فیستڤالا دھۆک یا شەشێ دا دھێتە نیشادان.
محەمەد ژووری دەرھێنەرێ فلمێ(مرن بۆ ژیانێ) بۆ بەرپەرێ ھونەری گۆت: فلم بەرھەمێ ھەر دو وەلاتێن(کوردستانێ و ئەلمانیا)یە و قارەمانێن فلمی پتری دکتورن، قارەمانێ فلمی(د.ھشیار عیسا) یە کا چەوا ل شەرێ داعش ھاریکاریا خەلکی و پێشمەرگەی کریە و ھەمان دەم ئه‌مبۆلانسان، خەلاتەکێ مەزنە ل فیستڤالا دھوکێ دا ھاتیە وەرگرتن .
ھەر ژ دەسپێکا سالا 2014 ئانکو ھاتنا داعش ھەتا ب دووماھی ھاتنا داعش فلم ھاتیە وێنەکرن کو دبیتە نێزیکی چار سال و نیڤان، ھەموو قووناغێن ھەر چار سالێن سەخت ھاتینە دیارکرن، فلم ل سەر ژیانا دکتورەکی یە کو ل دەسپێکا روودانێن داعش چوویە چیایێ شنگالێ بۆ خزمەتکرنا خەلکی و تووشی گەلەک مەترسیا دبیت، (رێبەر محەمەد) پشتەڤانیا فلمی کریە و تایبەت ل دەمێ مونتاژکرنێ دا،
دەرھێنەرێ فلمی ئەو ژی ئاشکراکر کو (محەمەد ژووری، چەکڤان ئامێدی) ب کارێ وێنەگرتنێ رابووینە، مونتاژ (ھەکار عەبدالقادر) دەنگ و رەنگ ل کومپانیا (پرێت فلم) ل ھەولێرێ ھاتیە دروستکرن.
جھێ ئاماژەکرنێ یە کو ئەڤ بەرھەمە دبیتە بەرھەمێ پێنجێ کو محەمەد ژووری ب دەرھێنانێ رادبیت، ھەتا نوکە ب بەرھەمێن بوری ھەشت خەلات ل وەلاتێن جودا ل سەر ئاستێ جیھانێ وەرگرتینە.
