نوكە چو خێزانێن مەسیحی ل شنگالێ نەماینە
دهۆك، لەزگین جوقی:
نوونەرێ مەسیحیان ل شنگالێ دبێژیت: مەسیحی ل شنگالێ بەر ب كێمبوونێ دچن و ڕەوشا وان گەلەك یا خرابە 52 مالێن مەسیحیان ل شنگال هەبوون نوكە هیچ مالەكا مەسیحیان ژی ل شنگالێ نینە ئێكەم خێزانا مەسیحی زڤری بوو شنگالێ، لێ ئەو ژی دوبارە ئاوارەی هەرێما كوردستانێ بوویە.
عیسا شەمعۆن، نوونەرێ مەسیحیان ل شنگالێ گوت» مەسێحیێن شنگالێ ب رێژەیا 50% كۆچبەرێ دەرڤەی وەلاتی بووینە ژ ئەگەری نەبوونا سەقامگیریێ ل شنگالێ وهەر جهەكێ سەقامگیری تێدا نەبیت وەلاتیێن مەسیحی نەشێن تێدا بژین، ل سالا 2014ێ و وێڤە 52 مالێن مەسیحیان شنگال بجهـ هێلایە ژ ئەگەرێ هیرشا تیرۆرستێن داعشێ و بتنی ئێك خیزانا مەسیحی بەری چەند سالان زڤری بوو شنگالێ لێ جارەكا دی وێ خێزانێ ژی شنگال بجهـ هێلا و دوبارە ئاوارەی هەرێما كوردستانێ بوو».
گوت ژی» چو خێزانیێن مەسیحی نوكە ل شنگالێ نەماینە چونكو خەلكی باوەری نینە ڤەگەڕن وڕەوشا شنگالێ یا خرابە».
نوونەرێ مەسیحیان ل شنگالێ دیاركر» ئەڤە نەهـ سالن هێشتا ئەم ئاواراینە وچو هاریكاری نەهاتیە كرن بۆ زڤڕینا مەسیحیان وهەتا ژی ئێزدی و موسلمانێن شنگالێ ژی هێشتا ئاوارانە وبابەتێ زڤرینا ئاوارەیان هاتیە تێكهەلكرن و ڕەوشا شنگال گەلەك یا خرابە وخەلك نەشێن تێدا بژین ژ ئەگەری هەبوونا گرۆپێن چەكدار یێن ژ دەرڤەی قانوونێ».
