نووترين زانيارى ل سه‌ر سنێلێن ژ چاكسازيا ئێتيتێ ره‌ڤين
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌رێ چاكسازيا ژن و سنێلان ل دهۆك بۆ ئه‌ڤرۆ نيوز نووترين پێزانين ل سه‌ر وان سنێلێن بزاڤا ره‌ڤينێ كرين ژ چاكسازيا ژن و سنێلان ل ئێتيتێ كر و دا زانين كو هه‌ر ل ناڤ چاكسيازيێ خوه ڤه‌شارت بوو.
مالپه‌رێ رووداو زارده‌ڤێ سلێمان ئاليخان، به‌رپرسێ نڤيسينگه‌ها دهۆك يا تۆڕا ميديايى يا رووداو، راگه‌هاند بوو كو شێڤدى ده‌مژمێر 2:30، هه‌شت زيندانى ژ چاكسازيا ژن و سنێلان ل ئێتيتێ ره‌ڤى بوو و پشتى چه‌ند ده‌مژمێران پێنج هاتبوونه ده‌سته‌سه‌ركرن و ئه‌ڤرۆ سپێدێ ژى سێ يێن ماين هاتبوونه ده‌سته‌سه‌ركرن، ئه‌ڤرۆ نيوز ژى ئه‌ڤ نووچه ژ زار ده‌ڤێ وان به‌لاڤكربوو.
زه‌كى سالح، رێڤه‌به‌رێ چاكسازيا ژن و سنێلان ل دهۆكێ بۆ ئه‌ڤرۆ نيوز گۆت: “شڤێدى ده‌مێ ته‌ماشه‌كرنا ياريا ريال مه‌دريد و ئه‌تله‌تيكۆ مه‌دريد، چار سنێلان ب هێجه‌تا ئاڤ ڤه‌خوارنێ، چووينه لێنانگه‌هێ و پاشان ژى خوه ل ناڤ باخچێ چاكسازيێ ڤه‌شار بوون”.
زێده‌تر گۆت: “پشتى جه‌ردا وان هاتيه كرن ديار بوو كو چار سنێل دكێمن و هه‌ر ئێكسه‌ر ده‌ست ب لێگه‌ريانێ د ناڤ چاكسازيێ دا هاته كرن”.
دا زانين ژى كو پشتى لێگه‌ريان هاتيه كرن ل جهه‌كى گيا گه‌له‌ك بلند ببوو، ئه‌وان ژى خوه د ناڤ وى گيايى دا ڤه‌شارت بوو و ئێكسه‌ر دووباره هاتنه ده‌سته‌سه‌ركرن.
ل سالا 2011 ژى 11 زيندانى ژ چاكسازيا مه‌زنان ل دهۆكێ ره‌ڤى بوون و هنده‌ك كه‌س ژ وان خوه دابوو ده‌ست و هنده‌ك ژى هه‌تا نوكه نه‌هاتينه ده‌سته‌سه‌ركرن.