نووترين پێزانين ل سه‌ر هژمارتنا دو سالێن خزمه‌تێ بۆ فه‌رمانبه‌ران
ئەڤرۆ:
جێگرا سەرۆکا لژنا قانوونی ل پەرلەمانێ کوردستانێ بۆ ئەڤرۆ دیار کر کو ئەو دێ ھەموو بزاڤان کەن پرۆژە قانوونا “پەسنا فەرمانبەران” ئانکو ھژمارتنا خزمەتا فەرمانبەران یا ئەڤ سالە ب دو سالان بەری ھاتنا سالا نوو پەسەند بکەن.
دکتۆرە بھار مەحموود خویا کر کو خواندنا ئێکێ بۆ ڤێ پرۆژە قانوونێ ھاتیە کرن و بۆ لژنا وان و یا دارایی ھاتیە ھنارتن و پەرلەمان چاڤەرێی راپۆرتێن وانە، دا کو خواندنا دویێ بۆ بکەت.
بھار خانێ ئاشکرا ژی کر کو ھەموو ئەو ئمتیازاتێن ل سالەکا ئاسایی بۆ فەرمانبەری دھێنە ھژمارتن، ل سالا دھێتە زێدەکرن ژی دێ بۆ ھێنە ھژمارتن و گۆت: “دێ بزاڤان کەین بەری ئەڤ وەرزێ قانوون دانانێ ب دووماھی بھێت، ئانکو بەری 1\1\2015 ڤێ پرۆژە قانوونێ پەسەند بکەین و باوەر ناکەم چو ئالی دژ بن”.
ھەژی گۆتنێ یە، ژ بەر قەیرانا دارایی و گیرۆبوونا مووچەی و بھێن فرەھیا فەرمانبەران، پرۆژە قانوونا “پەسنا فەرمانبەران” نوکە ل پەرلەمانی یە و ل گۆڕەی ناڤەرۆکا پرۆژەی، خزمەتا ئەڤ سالە یا فەرمانبەران دێ ب دو سالان ھێتە ھژمارتن.