نووترین پێزانین ل سەر بەلاڤکرنا پارچێن ئەردی
ئەڤرۆ نیوز:
بڕیاربوو پشتی سەرێ سالا نوو دەست ب بەلاڤکرنا پارچێن ئەردی بھێتەکرن، ئەندامەکێ لیژنا باژێڕڤانیێ ژی دبێژیت، ھەموو وەزارەتان لیستا فەرمانبەرێن خوە نەداینە باژێڕڤانیێ.
سیراج شێخ ئەحمەد، ئەندامێ لیژنا باژێڕڤانیێ ل پەرلەمانێ کوردستانێ بۆ رۆژناما ئەڤرۆ گۆت “نوکە رێڤەبەرایەتیەکا گشتی ل دیوانا وەزارەتا باژێڕڤانیێ مژوولی ڤاڤارتنا ناڤێن وەلاتیانە بۆ بەلاڤکرنا پارچێن ئەردی، و گۆر پێزانینێن من دو لیست گەھشتینە وەزارەتێ و نوکە کار یێ ل سەر دھێتەکرن، ئەز بەردەوام دوڤچوونا بەلاڤکرنا پارچێن ئەردی دکەم، ژبەرکو پەیوەندی ب ژیانا وەلاتیان ڤە ھەیە و ھژمارەکا زۆرا وەلاتیان کرێدارن و چاڤەڕێی بەلاڤکرنا ئەردی دکەن”.
ئەندامێ لیژنا باژێڕڤانیێ ل پەرلەمانێ کوردستانێ گۆت ژی “ھەموو وەزارەتێن حوکمەتێ ھەڤکار نەبووینە د بەرھەڤکرنا لیستا فەرمانبەرێن خوە دا، ھەتا نوکە ب تنێ حەفت وەزارەتێن حوکمەتێ لیستێن خوە رادەستی باژێڕڤانیێ کرینە و ھژمارەکا وەزارەتان لیستێن خوە نەئیناینە وەزارەتا باژێڕڤانیێ، لەوڕا نەبوونا ناڤێن فەرمانبەرێن ئەڤان وەزارەتان بوویە ئەگەرێ چێبوونا ئاریشێ”.
ھەروەسا سیراج شێخ ئەحمەد گۆت “وەزارەتا باژێڕڤانیێ چاڤەڕێی لیستێن وەزارەتان دکەت و ئەگەر ئەڤ رۆتینا ئیداری نەبایە، بێگومان دا زووتر ڤاڤارتنا ناڤان ب دووماھی ھێت و ئەرد ھێنە بەلاڤکرن، ھەردەمێ ناڤێن ھەموو وەلاتی و فەرمانبەران گەھشتە وەزارەتا باژێڕڤانیێ دێ دەمەکێ نێزیک ھێنە ھنارتن بۆ سەرۆکایەتیا جڤاتا وەزیران و بڕیار ل سەر بەلاڤکرنێ ھێتەدان، نەشێم بێژم چو ژڤان ھەنە بۆ بەلاڤکرنا پارچێن ئەردی، بەلێ حوکمەت یا رژدە ئەردی بەلاڤ بکەت و دێ کار ل سەر ھێتەکرن ھەتا دووماھی دھێت و وەلاتی ئەردی وەربگرن، لێ ناھێتە ڤەشارتن مەرج نینە د ئەڤ سالە دابیت”.
