رێنمایێن نوو بۆ پێدانا پاسپۆرتان ھاتنە بەلاڤکرن
ئەڤرۆ نيوز:
ل دووڤ رێنمایەکێ ھەر وەلاتیەکێ عیراقی یێ پاسپۆرتا خوە نوو بکەت دڤێت 200 ھزار دیناران رسۆماتان بدەت.
ل دووڤ رێنمایێن حوکمەتا عیراقێ کو ئاراستەی ھەموو رێڤەبەریێن پاسپۆرتان کریە، مەرجێن خزمەتگۆزاری بۆ پێدانا پاسپۆرتێ ب وەلاتیێن مامەلێن وان نە دئاسایی ژ نوکە وێڤە دێ ب ڤی شێوەیی بیت، نووکرنا پاسپۆرتا ئاسایی ھەکە دەمێ وێ ب سەرڤەنەچووبیت، ئانکو دەمێ وێ ژ سالەکێ زێدەتر مابیت ب رازەمەندیا وەلاتی ب خوە دشێت پاسپۆرتا خوە نوو بکەت ب مەرجەکی چەکەکێ بانکی ب کوژمێ 200 ھزار دیناران ببڕیت.
د ھەمان رێنما دا ھاتیە کو دانانا ناڤێ سێیێ (باپیر) ل سەر پاسپۆرتێ ل جھێ ناسناڤی پێدڤیە چەکەکێ بانکی ب کۆژمێ 100 ھزار دیناران ببڕیت، ھەروەسا وەکھەڤکرنا ناڤی ب ھەر دو نڤیسینێن عەرەبی و لاتینی ل دووڤ بەلگەنامێن بیانی، پێدڤیە چەکەکێ بانکی ببڕیت ب کوژمێ 150 ھزار دیناران، ئەڤە سەرەرایی ب جە ئینانا خالا ئێکێ.
ل دوووماھیا ڤان رێنمایان ھاتیە کو ھەر وەلاتیەکێ داخوازا دەرخستنا پاسپۆرتێ ب شێوەکێ لەز بکەت پێدڤیە چەکەکێ بانکی ب کوژمێ 250 ھزار دیناران ببڕیت.
