نوونه‌ر دێ بۆ ده‌ڤه‌رێن ده‌رڤه‌ى ئيدارا هه‌رێمێ ل په‌رله‌مانى هێنه دانان
ئه‌ڤرۆ نيوز، نيوار محه‌مه‌د سه‌ليم:
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ تايبه‌ت بۆ ئه‌ڤرۆ نيوز راگه‌هاند كو ئه‌وان وه‌كو فراكسيۆنا زه‌ر پرۆژێ قانوونه‌كێ به‌رهه‌ڤكريه و دايه سه‌رۆكاتيا په‌رله‌مانى و ب گۆره‌ى وى پرۆژه‌ى دێ په‌رله‌مانێ كوردستانێ ئه‌ندامێن چاڤدێر ل ده‌ڤه‌رێن ده‌رڤه‌ى ئيدارا هه‌رێمێ هه‌بن.
محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ گۆت: “مه وه‌كو فراكسيۆنا زه‌ر ل په‌رله‌مانێ كوردستانێ پرۆژێ قانوونه‌كێ ل ژێر ناڤێ ئه‌ندامێ چاڤدێرێ په‌رله‌مانێ كوردستانێ دايه ده‌ست سه‌رۆكاتيا هه‌رێما كوردستانێ، من ب خوه ل ماوێ دو هه‌يڤێن بۆرى دا، كار ل سه‌ر كريه و به‌رهه‌ڤ كريه”.
زێده‌تر گۆت: “زێده‌ترى 45 ئه‌ندامێن په‌رله‌مانى ژ هه‌موو فراكسيۆنێن نێڤا په‌رله‌مانى ئيمزا كريه و ئه‌ڤ پرۆژێ قانوونێ مه پێشكێشى سه‌رۆكاتيا په‌رله‌مانێ كوردستانێ كريه”.
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ دازانين كو ب گۆره‌ى ڤێ قانوونێ ئه‌ندامێ په‌رله‌مانێ كوردستانێ دێ نوونه‌رێن خوه ل ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ هه‌بن وه‌كو ل مووسل و ديالا و كه‌ركووك ب ناڤێ ئه‌ندامێن چاڤدێر.
محه‌مه‌د عه‌لى ياسين ئاشكه‌را ژى كر كو هه‌ر ب گۆره‌ى ڤێ قانوونێ دێ په‌رله‌مانى نوونه‌راتيا خوه ل وان ده‌ڤه‌ران هه‌بيت و گۆت: “يا خۆيايه ئه‌م نه‌شێين هه‌لبژارتنان ل وان ده‌ڤه‌ران بكه‌ين و ئه‌ڤ ده‌ڤه‌ره ژى زێده‌ترى 51% ژ ئاخا كوردستانێ ب خوه ڤه دگريت”.
ئه‌ندامێ په‌رله‌مانێ كوردستانێ و ئاماده‌كارێ پرۆژه‌ى زێده‌تر ئه‌ڤ پرۆژه رۆهنكر و گۆت: “نموونا ئه‌ندامێن چاڤدێر ل گه‌له‌ك رێكخراوێن نێڤده‌وله‌تى يا هه‌يى، بۆ نموونه نه‌ته‌وێن ئێكگرتى ب تنێ وه‌لاتان وه‌ردگريت، به‌لێ فه‌له‌ستين وه‌كو ئه‌نداما چاڤدێر وه‌رگرتيه، په‌رله‌مانێ كوردستانێ ژى دڤێت نموونه‌كا گه‌له‌ك نوو كو پێشتر ل جيهانێ نه‌بوويه بينيته پێش ب ره‌نگه‌كێ قانوونى”.
خۆيا ژى كر كو پشتى ئه‌ڤ پرۆژه دبيته قانوون دێ شێين ئاگه‌هدارى ئه‌و كێماسيێن ل وان ده‌ڤه‌ران هه‌ين بن و دێ وان ده‌ڤه‌ران نوونه‌رێ خوه ژى ل په‌رله‌مانێ كوردستانێ هه‌بن.
ده‌رباره‌ى ماف و ئيمتيازاتێن ئه‌ندامێ چاڤدێر ژى گۆت: “نوونه‌رێ چاڤدێر دێ هه‌موو ئه‌و ماف و ئيمتيازاتێن ئه‌ندام په‌رله‌مانێ كوردستانێ هه‌ين، هه‌بن ب تنێ ده‌نگدان نه‌بيت و خوه به‌ربژێر كرن بۆ سه‌رۆكاتيا په‌رله‌مانى و سه‌رۆكاتيا لژنان. دێ ماف هه‌بيت پرۆژان پێش كێش كه‌ت و ئيمزايان ل سه‌ر پرۆژان كه‌ت، مافێ پشكداريكرن و گه‌نگه‌شێ د روونشتنێن په‌رله‌مانى دا دێ هه‌بيت”.
