نوونەرێن پارێزگەھێ مفا ژ یاریگەھێن خوە نەدیتن
ئەڤرۆ نیوز،ھەژار مەعروف:
دوھی و ئەڤرۆ شەش یاری ژ خۆلا پلا نایاب یا کوردستانێ ھاتەکرن ژ چارچوڤێ یاریێن حەفتیا دووماھیێ ژ قوناغا ئێکێ یا خولێ کو ئەڤ حەفتی یە ب حەفتیا وەکھەڤیان ھاتە ھژمارتن کو د سەرجەمێ شەش یاریان دا پێنج یاری ب وەکھەڤی ب دووماھیی ھاتن .
تیما تەپا پێ یا دھۆک دو خالێن گرنگ ژ دەستدان دەمێ ل یاریگەھا خوە وەکھەڤبووی ل گەل یانا نەوروز ب گولەکێ کو ل دەستپێکێ یانا نەوروز ب گولا یاریزانێ خوە دیار عەلی ل دقیقا ٥ پێشکەڤت و ل نیڤا دوێ یانا دھۆک ب رێیا یاریزانێ خوە موئەید عەبدولباست گولا وەکھەڤیێ تومارکر ل دقیقا ٥٧ و ب ڤی ئەنجامی دھۆک خالێن خوە گەھاندنە ٢٢ خالان ل رێزا دوێ دھێت و نەوروز ژی ل رێزا سیێ ب ٢١ خالان.
ژلایەکێ دیڤە ھەردو یانێن ئاکرێ و زاخۆ ل یاریگەھا شێخان بێ گول وەکھەڤبوون کو بریار بوو ئەڤ یاری یە ل یاریگەھا ئاکرێ بھێتەکرن لێ ژبەر ئەردێ یاریگەھا ئاکرێ نە یێ ھاریکار بوو یاری بوو یاریگەھا شێخان ھاتە ڤەگوھاستن و ب ڤی ئەنجامی ئاکرێ خالێن وێ بوونە ٩ خال رێزا ١٣ و بەری دووماھیێ دھێت و زاخۆ ب ١٤ خالان ل رێزا ١١ دھێت.
ژ لایەکێ دیڤە دوھی تیما زێرەڤانی دناڤ ئەرد و جەماوەرێ خوە دا دو خالێن گرنگ ژ دەستدان دەمێ ل گەل یانا دەربەندیخان وەکھەڤبووی ب گولەکێ کو گولا دەربەندیخان ل دقیقا ٩٠ ھاتبوو تومارکرن و ب ڤی ئەنجامی زێرەڤانی خالێن وێ بوونە ١٨ خال ل رێزا حەفتێ دھێت و دەربەندیخان ل رێزا ١٠ ب ١٥ خالان دھێـت .
ژ ئەنجامێن دی یێن حەفتیا ١٣ ژ خولا پلا نایاب ھەولێر ب سەرکەفت ل سەر یانا پێشمەرگا سلێمانیێ ب دو گولان بەرامبەر گولەکێ و ھەردو یاریێن شێروانە ل گەل ھندرین و ئارارات ل گەل برایەتی ب وەکھەڤی ب دووماھیی ھاتن و بریارە سوباھی دووماھیی یاری ژ قوناغا ئێکێ خولێ بھێتەکرن دناڤبەرا ھەردو یانێن پێشمەرگا ھەولێر و گاز باکور ل یاریگەھا پێشمەرگە
