نوونەرەکێ تورکمان : حەیدەر عەبادی ئەم خاپاندین

ئەڤرۆ نیوز:
ئەندامەکێ تورکمانی د جڤاتا نوونەرێن عیراقێ دا د داخۆیانیەکێ دا بۆ رۆژناما ئەڤرۆ گۆت، ئەم ل گەل حەیدەر عەبادی سەرۆک وەزیرێن عیراقێ رێککەفتبووین کو ژ وان پێنج وەزیرێن بھێنە دیارکرن ئێک ژوان تورکمان بیت، بەلێ د روونشتنا دوھی یا جڤاتا نوونەران دا عەبادی ئەم خاپاندین و چو ناڤێن کەسایەتیێن تورکمان پێشکێش نەکرن بۆ جڤاتا وەزیران و مافێ مە یێ سروشتیە مە وەزیرەک ھەبیت، چاوان برایێن مەسیحی کو ھژمارا وان ل عیراقێ ژ 50 ھزار کەسان نابۆریت و وەزیرەک ھەبیت و تورکمان دو ملیۆن و نیڤن و چو وەزیر نەبن.
نیازی معمار ئوگلۆ ئەندامێ تورکمان د جڤاتا نوونەرێن عیراقێ دا بۆ ئەڤرۆ زێدەتر گۆت” ھەتا دوھی بەری دو رۆژان ژی ئەم تورکمان ل گەل عەبادی د رێککەفتی بووین کو پۆستێ وەزیرێ بازرگانی بۆ تورکمانان بیت، ھەتاکو مە چو ناڤ ژی ل سەر عەبادی نەسەپاندبوون، بەلکو مە دەلیڤە دابوویێ کەسایەتیەکێ تورکمان بەربژارکەت بۆ پۆستێ وەزیرێ بازرگانی و ئەو رێککەفتنە یا بەردەوام بوو ھەتا دەمژمێر 10 شەڤا 14 تەباخێ، دەمێ عەبادی گەسایەتیەکێ خەلکێ بەسرا دانایە جھێ کەسایەتیێ تورکمانی”.
ئوگلۆ کو د ھەمان دەدا بریاردەرێ ئێکی یە یێ جڤاتا نوونەرێن عیراقێ، دیارکر” مە نەزانی ئەگەرێن وێ پێرابوونا عەبادی چ بوون و د روونشتنا دوھی دا یا جڤاتا نوونەران کو عەبادی ب خوە یێ بەرھەڤ بوو، من داخواز ژ عەبادی کر بھانەکێ بۆ وێ سەرپێچیا وی ل مادا 9 یا دستوورێ عیراقێ کری کو تێدا ھاتیە دیارکرن دڤێت نوونەرێن ھەموو پێکھاتێن عیراقی د دەزگەھێن دەولەتێ دا ھەبن، بەلێ عەبادی چ بھانە و ئاخڤتن نەبوون، لەوما نەشیا بەرسڤا من بدەت”.
ل دۆر کەسایەتیێ تورکمانی یێ تورکمان ل سەر د رێککەفتی نە بۆ وەرگرتنا پۆستەکێ وەزاری ل بەغدا، معمار ئوگلۆی گۆت” دکتور ئۆمێد ئەحمەد کو مامۆستا بوو ل زانکۆیێن کەرکووکێ و کویە، کو کەسایەتیەکێ سەربخوە و پیشەیی و تەکنوکراتە، بەلێ عەبادی دیارکر کو سۆزێن خوە ب جە نائینیت و کەسایەتیەک ژ بەسرا بەربژارکر ئەوژی دکتور یوسف ئەلئەسەدی کو د دەنگدانێ دا دەنگێن پێدڤی یێن پەرلەمانتاران ب دەستڤە نەئینان”.
ئوگلۆی خویاکر ژی” پشتی ئەو ناڤێ عەبادی پێشکێشکری بۆ وەزارەتا بازرگانی دەنگێن پەرلەمانتاران بدەستڤەنەئیناین مە ھەر دوھی داخواز ژ جڤاتا نوونەران کر کو پێدڤیە پۆستەکێ وەزاری ب تورکمانان بھێتە دان وەکو ھەموو پێکھاتێن دی، ب تایبەتی د ھەموو حوکمەتێن بەرێ یێن عیراقی دا پشتی 2003 ێ، تورکمانان پۆستەکێ وەزاری ھەبوو، ھەتا د حوکمەتا عەبادی ژی دا مە پۆستێ وەزیرێ مافێن مرۆڤی ھەبوو، بەلێ ژبەر کێمکرنا وەزارەتان ئەو وەزارەت ھاتە ھەلوەشاندن، لەوما نوکە مافێ مەیێ سروشتیە پۆستەکێ وەزاری مە ھەبیت و ھەموو لیستێن پەرلەمانی پشتەڤانیا مە دکەن ژوان ژی لیستا کوردستانی”.
ل دۆر شرۆڤەکرنا وی بۆ وی کارێ عەبادی ئەنجامدای، گۆت” دبیت حقدەک ھەبیت دژی تورکمانان، یان ژی راسپاردەک ژلایێ بالیۆزخانەکێ بۆ ھاتبیت، ژبەر کو دەمێ من داخواز ژێ کری بھانەکێ بۆ ڤی کاری بینیت، خوە بێ دەنک کر و بەرسڤا من نەدا، دیسا حوکمەتا عەبادی چو پۆستێن وەزاری یان بریکارێ وەزارەتەکێ و ھەتاکو پۆستێ سەرۆکاتیا دەستەکەکێ ژی نەدایە شەبەکان، ھەکە ب ڤی شێوەی بیت پا کا مافێ پێکھاتان و کا دستوورێ عیراقی کو عەبادی پێگیری پێ نەکرری و بن پێ کری؟”.

کۆمێنتا تە