نڤیسینگه‌ها سه‌رۆكێ حوكمه‌تێ رۆهنكرنه‌كێ ل دۆر باجێ به‌لاڤ دكه‌ت
ئه‌ڤرۆ:
نڤیسینگه‌ها سه‌رۆكێ حوكمه‌تا هه‌رێما كوردستانێ رۆهنكرنه‌ك ل دۆر باجێ به‌لاڤ كر و تێدا هاتیه: ئێك ژ ئارمانجێن كابینه‌یا نه‌هێ یا حوكمه‌تا هه‌رێما كوردستانێ د چارچوڤێ كارناما وێ دا رێكخستنا باجێ یه.
دیسا د وێ رۆهنكرنێ دا هاتیه: “حكومه‌ت وه‌كو ده‌ستهه‌لاتا بجهئینه‌ر نه‌شێت باجێ زێده بكه‌ت، به‌لكو ئه‌ركێ وێ ب تنێ بجهـئینانا یاسایایه و ئارمانجا وان رێكارێن حوكمه‌تێ بۆ وه‌رگرتنا باجێ گرتینه به‌ر بتنێ بۆ رێكخستن و رێگریكرنێ بوو ل به‌رامبه‌ر خوه دزینێ ژ باجێ، هه‌ر د ڤی چارچوڤه‌ی دا، باجا كۆمپانیێن مه‌زن هاتییه رێكخستن و ئه‌ڤێ چه‌ندێ ژی كارتێكرن ل سه‌ر زێده‌كرنا داهاتی هه‌بوویه و ئه‌و داهاته ژی بۆ خزمه‌تا وه‌لاتیان دهێته مه‌زاختن”.
نڤیسینگه‌ها سه‌رۆكێ حوكمه‌تێ د وێ رۆهنكرنێ دا خویا ژی كریه كو د ڤی ده‌می دا گازنده ژ زێده‌بوونا رێژا باجا پیشه‌وه‌ر و خودان دكان و پیشه‌یێن بچووك هه‌بوویه، له‌وما سه‌رۆكێ حوكمه‌تێ دووڤچوون بۆ ڤی بابه‌تی كریه و پشتی چه‌ند كۆمبوونان فه‌رمان ب لایه‌نێن په‌یوه‌ندیدار هاته‌كرن، كو دیاركرنا باجه‌كا زۆر بۆ خودان پیشه‌یێن بچووك بهێته راگرتن و دگه‌ل وه‌رگرتنا باجێ ره‌وشا ئابووری و ژیانا پیشه‌وه‌ران ل به‌رچاڤ بهێته وه‌رگرتن و نابیت باج ببیته ئه‌گه‌رێ لاوازكرنا لڤینا بازاری.
هه‌ر د وێ رۆهنكرنا نڤیسینگه‌ها سه‌رۆكێ حوكمه‌تێ دا هاتیه: “حوكمه‌تا هه‌رێمێ ب رێیا بسپۆرێن بیاڤێ باجێ مژوولی رێكخستنا رێكارێن وه‌رگرتنا باجێ یه، ب ره‌نگه‌كی كو دیاركرنا رێژه و كۆمكرنا باجێ ب شێوه‌یه‌كێ دادپه‌روه‌رانه و زه‌لال بیت، دیسا هه‌تا ئاماده‌بوونا وی سیسته‌می ژی نابیت بارگرانیا دارایی بۆ پیشه‌وه‌ران دروست ببیت”.
