نڤیسینگەها سەرۆكێ حوكمەتێ: بلا موزایەدە ل سەر خەلكێ سلێمانیێ نەهێتە كرن
نڤیسینگەها سەرۆكێ حوكمەتا هەرێمێ ڕاگەهاند، ئەگەرێ كێشەیا دارایی ل سلێمانیێ ئەوە كو پرۆسەیا كۆمكرنا داهاتی یا زەلال نینە و ڕێك ژی ناهێتە دان چاڤدێریەكا ناڤەندی ل سەر وێ پرۆسەیێ هەبیت. هەروەسا دیاركر كو دەمەكە ڕاگەهاندن و كەسانێن نێزیكی قوباد تالەبانی، جێگرێ سەرۆكێ حوكمەتێ، پرۆپاگندێ دكەن كو (وەكو هەلوەستەك ژ پێخەمەت مووچەخۆرێن سلێمانیێ وی بایكۆتا كۆمبوونێن جڤاتا وەزیران كریە) بەلێ بەرگری ژ خەلكێ سلێمانیێ ئەركێ هەموو تیمێن وەزاری یە و هەكە ستەمەك بەرامبەر خەلكێ سلێمانیێ هەبیت، هەر وەزیرێن پارتی و گۆڕان و سوشیالیست قبوول ناكەن، لەوما بلا موزایەدە ل سەر خەلكێ سلێمانیێ نەهێتە كرن و جهێ چارەسەریا هەموو ڤان كێشەیان تنێ كۆمبوونێن جڤاتا وەزیرانە و هەكە قوباد تالەبانی و تیما وی هەست ب بەرپرسیاریێ بەرامبەر خەلكێ سلێمانیێ دكەن بلا بزڤرن بۆ كۆمبوونان و دانوستاندنێن ئاڤاكەر بكەن.
