نڤیسەری
عبدالرحمن بامەرنی
بەری چیرۆكا خوە بنڤیسیت:
هەڤالێ منێ نڤیسەر بوو و ئەوێ ب هەڤژین و ئەزێ زگورد، دەما من گۆتیێ: من بریارا دایی ئەز هەڤژینیێ پێكبینم! گۆتە من راوەستە، تا ئەز ژ چیرۆكا خوە یا نە تەمامكری ب دووماهی دهێم، پاشی بریارا خوە بدە.
دەمێ چیرۆكا خوە دنڤیسا:
مێزا ل بەر سینگا وی، چەند پەرتووكەك یا ل سەر و كۆپەكێ ئاڤێ و خولیدانكەكا تژی قوپكێن جگارێ و هێشتا دروست قەلەمێ خوە نەكریە دناڤ تبلێن دەستێ خوەدا، دەنگێ پت پتا هەڤژینا وی دگەل گڤەگڤا بای و تەق تەقا پەنجەرێ تێكەلی ئێكبوون و قەلەمی خوە ژناڤ دەستێن وی هاڤێت و دگەل وان چركەیان، كارەب ژی هاتە برینێ و بۆ تبلچاڤكانێ.
ڤی هرەبایێ خودێ دزانیت نوكە دار ژ رهـ و ریشالان ئیناینە دەرێ و پت پتا هەڤژینا وی دبن لحێڤاڤە، سەرا ڤان پەنجەرەیێن ئەو دهێلیتە ڤەكری، ڤێ سرێ و هەر گاڤا ژ خەو رابوو گەهشتە پەنجەرەیان و ڤەكرن، دێ بێژی ئەڤە نەخانیە ئەو تێڤە، بەلكو كۆتانا پەزییە و بێهنێ خمخمكێن دفنێن وێ یێن تژیكرین. خوە ل هاتنا كارەبێ نەگرت و دڤێت بچیت پەنجەرەیێ بگریت و هێشتا دروست نەرابوویەڤە و قەلەمێ د دەستێ خوەدا ل سەر مێزێ نەدانای، دەستێ وی چوو سەر كۆپێ شیشەیێ تژی ئاڤ و ژ مێزێ پەشی و درنگێن ژ عەردی ئینا، دەنگێ بژكینا شیشەی تێكەلی دەنگێ قیژیێن هەڤژینا وی بوو و گۆت، دیسان ئەو چ شكەست؟!! ئێ باشە كەتنا كۆپێ شیشەی ئەگەر مەحفیر یا رائێخستیبایە، دا كەڤیتە سەر مەحفیرێ و نە د شكەست و ئەڤ دەنگە ژی ژێ نەدهات، ئەڤ هەڤژینا ژ تشتەكی نە رازی، دو هەیڤ دەرباز نابن، دڤێت مەحفیرێ بشووت و بێژیتە من دێ وەرە ب سەر دیواریدا ب رائێخە، ئێ زڤستان و شویشتنا مەحفیر!
ب هاتنا كارەبێ ژۆر رۆهن بوو، پرتێن شیشەی ل هەمی جهەكی یێن بژالە بووین و قەستكرێ، دڤێت ئێك ئێكە وان پرتان ژ عەردی ڤێكدەت و هێشتا كەسێ خوە بریندار نەكری و سەرێ خوە ل ڤی ئالی و ل وی ئالی زڤراند و هندی راكرین راكرین و پەحنكا پێ وی كەتە سەر پرتەكا شیشەی و ئاییێن ژێ ئینا، چەند چپكێن خوینێ خوە ژ بنێ پێ وی هەلاڤێتن و روونشتە خارێ و پێ خوە بلندكر، هند خەما وی ئەو نینە شیشەی ژ پێ خوە بینتە دەرێ و خوینا پێ خوە رابوەستینیت، هندی خەما وی چ چپكێن خوینێ نەكەڤنە سەر مەحفیرێ، ئەگەر سوبەهەی تێشت و شیڤ و فراڤینێن وی دێ ل دەرڤەی مالێ بن.
هێشتا چیرۆك ب دووماهی نەهاتی:
نڤیسینا ڤێ چیرۆكێ درێژبوو و ئاخفتنا هەڤژینا وی یا خۆش بۆ وی، ئەو رۆژا ب رەش بیت یا من هەڤژینی دگەل نڤیسەرەكی پێكئینای! هندی ئاخفتنێن ب تیڤل دگۆتنێ و جارەكێ من ب ڤان گوها گوهلێ بوو، دگۆتێ، هندی من كەسەك هەبیت و ئەز كەسەكێ ناس بكەم ژی، دێ شیرەتا لێكەم، هەر كەسێ دو پەیڤان ژی بدویڤ ئێكڤە رێزبكەت، كەس دگەلدا نەچیتە د جهالێ هەڤژینیێ دا.
بریارا من یا دووماهیێ:
ئێدی من گڤشاتن ل هەڤالێ خوە یێ چیرۆكنڤیس نەكرن و بریارا من ژی ل سەر بابەتێ كا ژنێ بینم یان نەئینم ب دووماهی بریارا منڤە گرێدایە، كا ئەز بمینم نڤیسەر یان ل كارەكێ دی بگەرم!
