نڤیسەرەکێ تورک: ئەردۆگان دێ نەھێلیت قەندیل دەستێوەردانێ د کاروبارێن ھەدەپێ دا بکەت
ئەڤرۆ نيوز:
عەبدولقادر سەلڤی نڤیسەرێ ناڤدارێ تورکیا کو کەسەکێ نێزیکی پارتیا ئەردۆگانی یە دوھی راگەھاند کو سەرۆک کۆمارێ تورکیا رەجەب تەیب ئەردۆگان بزاڤێ دکەت نەھێلیت بەرپرسێن پەکەکێ ل قەندیلی دەستێوەردانێ د کاروبارێن ناڤخوەیی یێن ھەدەپێ دا بکەن، چونکو ئەردۆگان باش دزانیت پرانیا بەربژارێن پەرلەمانی و باژێرڤانیان یێن باکورێ کوردستانێ ژ ئالیێ قەندیلی ڤە دھێنە دەستنیشان کرن و گۆت: (ئەردۆگان داخواز ژ بەرپرسێن ھەدەپێ ژی کریە کو ل گۆر ئیرادا خوە سیاسەتێ بکەن و نەھێلن قەندیل دەستێوەردانێ د کاروبارێن وان دا بکەت، ھەکە ھەدەپێ بشێت ڤێ بکەت رەنگە زەمینە بۆ وان ل تورکیا خوەش ببیت لێ بەرۆڤاژی ڤێ یەکێ دێ ئەردۆگان دەستێوەردانێ کەت و بەری نھا ژی چەندین جاران سەرۆک کۆمارێ تورکیا ئاماژە ب ھندێ یا کری).
ناڤبری ئەو یەک ژی دیار کریە کو ھەکە بەرپرسێن پەکەکێ ل قەندیلی بەربژاران دیار بکەن دێ ژ ئالیێ سەرۆک کۆمارێ تورکیا ڤە ھێتە رەت کرن، دڤێت ھەدەپە ل گۆر ئیرادا خوە سیاسەتێ بکەت و بەربژاران دیار بکەت، ھەکە ئەو یەک نەھاتە کرن دێ ئالۆزیێن نوو روو دەن.
